Bonos díes, bona xente.

Alborecemos col cielu escampláu y xelando na mayor parte d’Asturies con unes temperatures que tan alrodiu de los 0ºC, rexistrándose nel puirtu Payares -3ºC. Muncho precuru coles carreteres qu’hai plaques de xelu en zones poco frecuentes y prauticamente toles carreteres perriba de los 800m cola nieve que cayó ayeri pela tardiquina tienen dalguna dificultá.

Güei vamos tener un día espectacular col cielu azul intensu y tola cordelera maquillada de blancu dende los 500m. El fríu intensu de les primeres hores va dir dando pasu a un ambiente más afayaizu gracies a la llume del sol que calecerá’l día con temperatures másimes yá perriba de los 10ºC. L’aire sedrá sele ya variable con dalgo de nordés pela costa.

Mañana xueves vamos tener dalguna nube más qu’impedirá que les xelaes seyen tan estendies como les de güei y tengamos un llixeru descensu de les temperatures másimes. L’aire sedrá sele ya variable con predominiu del nordés pel llitoral.

El vienres, sábadu y domingu vamos tener el cielu escampláu con xelaes nuecherniegues sobre too’l vienres y sábadu, anque les temperatures másimes van dir ascendiendo pali que pali, sobre too’l domingu. Fin de selmana perfeutu pa esfrutar de les montañes y la nieve, eso sí con precuru.

Que paséis un bon miércoles collacies ya collacios.

Semeya del Aramo visto dende’l Gamoniteiru.