Darréu se recibió en Madrid la solictú formal pa facer estes entrugues vía la coalición Agora Repúbliques, a la que pertenez Andecha Astur, el ministeriu camudó la versión que taben espardiendo

El casu de los 31 trenes que diben ser más grandes de la cuenta y que nun entamaren a fabricase tres años depués de ser encargaos pol Ministeriu Tresportes, Movilidá y Axenda Urbano enguedéyase díe a díe. Agora resulta qu’enxamás nun hebio un diseñu de tren que nun entrare pelos túneles, diz el Secretariu español d’Infracadarmes, Xavier Flores, de la que’l Ministeriu aparta a RENFE de la negociación, anunciando sobrecostes y reconociendo un plazu mínimu d’espera d’otros dos años.  La versión choca frontalmente cola que dieron a los gobiernos cántabros y asturianos, dexando nidio que yos tomen el pelu.

Estes declaraciones ocurren xusto darréu qu‘Andecha Astur unviare al Gobiernu español, al traviés del diputáu d’EH Bildu y miembru de la coalición Agora Repúbliques, Oskar Matute, una acusadora riestra d’entrugues. Nelles non solo piden desplicaciones, sinón que denuncien la desidia cola que se trata el futuru d’Asturies dende’l gobiernu estatal, el llabor  chapuceru del Ministeriu Tresportes, la complicidá cola que los integrantes del Gobiernu español consienten esto y la docilidá cola qu’Adrián Barbón aceuta too ello. 

Nes entrugues destaquen el fechu de que’l problema ya se conoz dende va polo menos dos años, cuando tuvo llugar una  xunta na que s’analizó’l problema d’estos trenes d’anchu métricu con escesu gálibu, desixendo que’l Gobiernu español faiga públicu’l documentu o acta de l’Axencia Estatal de Seguranza Ferroviaria, con data de setiembre de 2021, d’esta reunión. Esta xunta evidencia que ya entós Adrián Barbón taba informáu del problema, ensin que se conoza dala actuación al respeutu pola so parte, lo que dende Andecha Astur califiquen de “sumisión y obediencia que lu convierten en compliz”. 

Nelles piden tamién que se cuantifique’l sobrecostu qu’implicará el rediseñu de trenes ya’l so retrasu y que se compense a los usuarios de Renfe Cercanies por tener qu’aguantar otros tres años con trenes en condiciones llamentables.

No que cinca a responsabilidaes, los nacionaliegos nun consideren abondo la destitución de dos altos cargos del Ministeriu Tresportes, dambos con calter téunicu, sinón que desixen el cese de dalgún altu cargu de perfil políticu.

Pa finar, quieren que’l Gobiernu español confirme que nun tien inconveniente dalu pa negociar col Gobiernu d’Asturies el trespasu efeutivu de competencies esclusives en materia de ferrocarriles que circulen íntegramente per territoriu asturianu, dexando asina nidio que son Barbón y la FSA-PSOE los que se ñeguen a eses treferencies, “Que namás sedríen un pufu p’Asturies si ellos son unos inútiles o unos obedientes negociando con Madrid el valor económicu d’eses competencies. Lo que ta demostrando asina Barbón ye o la so docilidá énte Madrid, o la so incapacidá manifiesta comu negociaor o dambes coses“.

Taremos sollertes pa informar de les rempuestes.

Redaición InfoAsturies

This work is licensed under a Creative Commons Attribution 4.0 International License.