El xéneru urbanu Ástur tien enforma por dicir en 2023

16 Febreru, 2023

Tres un añu 2022 enllenu de sorpreses y mozos emerxentes, l’añu 2023 preséntase como ún de los más relevantes na hestoria del panorama urbanu musical ástur, equí tán dalgunos de los nomes a los que más sollertes tenemos de tar mientres los próximos meses

SlyN
A Nacho, un mozu uvieín de 20 años, sóbren-y les virtúes, sicasí la constancia ye la que más caracteriza al artista. Nos dos años que lleva activu espublizó más de 30 cantares na so canal de Youtube y collaboró con gran variedá d’artistes. El soníu de Nachu ye vraeramente inconfundible, y ye que, anque trabaye con gran variedá d’estilos, la voz de Sly al entrar a una base sigue siendo inconfundible.
El de la capital demuestra tener munches influyencies bien variaes, trabayó soníos del hip hop más purista, esperimentando esa caña al traviés del drumless, los Beats llentos y pesaos y los bangers esplosivos. Adulces foi probando, y vímos-y cantares más cercanes al soníu trap, como Balto o Young Misfits col Xixonés Di4997iem. Para esti 2023 SlyN promete ser un de los mayores baluartes del underground n’Asturies, les sos lletres, reconocibles poles sos barres úniques y la so creatividá.

Kinchy
La Calzada, un de los barrios más conflictivos d’Asturies, vio crecer al Italianu conocíu como Kinchy. El raperu y Driller de Caserta ufierta un de los soníos más particulares d’esta llista, caracterizáu pola violencia, el hardcore, les esperiencies vitales del artista y una voz esgarrada que paradóxicamente vuélvese un soplíu d’aire fresco na monotonía del soníu actual. Ensin dulda al falar de la so carrera tenemos qu’estremar dos fases bien estremaes, na primera’l boom bap foi’l so sellu d’identidá, con un soníu escuro y fondo qu’acompañaba de frases directes y punchantes. Sicasí, la vraera evolución del so soníu llegó col so primera single de Drill, y de magar entós entamó a amosar una faceta totalmente estremá y con muncho más potencial que l’anterior. Les sos frases volviéronse más rudes y los sos flows más agresivos; amás, yá dexó claro que col drill, atopó’l camín a siguir.

Dissiem
El de les “milquinientes” ufierta un de los soníos más modernos del panorama, trabayando les facetes más esperimentales ya innovadores del trap, detroit, hyperpop, eurobeat y demás soníos alternativos. El de Xixón dio-y un xiru a la so carrera va menos d’añu y mediu, cuando esborrió’l rastru d’un soníu totalmente distintu al que trabaya anguañu. De fechu el so trabayu boombaperu y filosóficu pocu tien que ver cola so movida actual, bien llimpia y curiosa pa los oyíos más selectivos del xéneru. Na so última espublización d’Instagram, dexábanos cinco previos de lo que tien pa 2023, y ensin dulda, el so 2023 va venir enllenu de sospreses.

Nel Dos Santos