Aston Martín y l’hestoria de Pedro y el llobu

20 Febreru, 2023

La nueva escuderia d’Alonso promete una temporada d’ésitos pa esti añu 2023; sicasí, nun ye la primer vegada qu’escuchamos daqué asemeyao d’un equipu al que pertenez l’asturianu

Magar les babayaes de ciertos miembros de Aston Martin, que presumíen d’atopar ciertos resquiebros nel reglamentu que potenciaren el rendimientu del coche, Fernando Alonso yá tuvo que salir a aselar los fumos ente los sos aficionaos, que yá se víen venir una temporada más esitosa de lo que pueden ufiertar los de Silverstone.

Nun ye nin la primer nin la segunda vegada que Fernando sufre poles mires puestes nos suyos, y ye qu’Alonso yá ta más qu’acostumáu a tener qu’enfrentó a que los sos equipos xeneren una falsa mira sobro les sos posibilidaes d’ésitu, p’acabar siendo’l quién tira del carru del equipu y non viceversa.

La primer vegada qu’El Nano s’enfrentare a esta situación fuere na temporada 2008 col equipu de la so vida, Renault. L’añu anterior, Fernando protagonizara, a comuña xuntu a Lewis Hamilton una de les meyores batalles ente compañeros d’equipu de la hestoria. El mozu debutante inglés y el bicampeón de los postreros dos cursos enfrentaronse de forma sangrienta, y anque quedaron empataos, naide duldó qu’Alonso ganara en pista, pero Hamilton ganárase a la estructura de McLaren al ser inglés y de la casa, polo qu’Alonso recayó nes files de Renault de nuevu l’añu siguiente, pero una temporada alloñáu del equipu caltúvolu llueñe tamién del baxón de rendimientu de los de Endstone, y el desempeñu en 2008 tuvo bien perbaxo de lo qu’esperaben los aficionaos de la dupla Alonso-Renault que tan esitosa fuera en 2005 y 2006.
Tres dos años en Renault, el d’Uviéu robló con Ferrari en busca d’un saltu de nivel, y anque quiciabes el Ferrari nunca tuviera al altor del so pilotaxe, la debacle llegó na temporada 2014. Ferrari, que venía de capa cayia dempués de que Red Bull arrasare la temporada 2013, esperaba que’l cambéu de reglamentu fora’l puntu d’inflexón pa retomar el ritmu de competición de los Tifosi. Nesa temporada, Lewis Hamilton foi’l campeón del mundu con más de 380 puntos, mentanto Fernando sacaba 160 d’un Ferrari nel que Kimi Raikkonen, una de les mayores lleendes de la categoría, solo foi capaz de sumar 55. Tal foi la debacle de la temporada que Fernando decidió abandonar l’equipu pa xunise a les files de McLaren.

Darréu, na temporada 2015 llego la más dura de les decepciones pa Fernando, McLaren axuntaba nes sos files a dos campeones del mundu al pie de el motorista más míticu de la hestoria del equipu, Honda. Button y Alonso fixeron una temporada bien meritoria, sicasí, de poco sirve tener a dos de los meyores pilotos de la parrilla si’l coche pasa más tiempu nel garaxe que sobro l’asfaltu del circuitu. De magar, hasta que pudo desvenceyase de los de Grove, el cantar pa Fernando sonaba siempres igual, abandonaben tantes vegaes como les que dicíen que diben ganar, y nin siquier el cambéu de motor Honda a Renault foi abondo pa tresformar la dinámica.

En 2020 Alonso nun pudo más cola decepción constante de McLaren, asina qu’acepto xunise a les files de Renault de nuevu pa formar parte del proyectu del equipu Alpine, el constructor de coches Renault d’Alta gama. El primer añu de Fernando destacó pol so encarnizada engarradiella con Esteban Ocon, el so compañeru d’equipu y los accidentes de dambos, pero’l discursu del equipu yera siempres el mesmu, teníen un plan. Los de Endstone queríen aprovechase del cambéu de reglamentu pa ponese cabezaleros pero ello ye que el Alpine nun foi capaz de salir de la zona media en tol cursu. El famosu plan de los de Alpine llegó a convertise nun vraeru meme a nivel estatal, pero la decepción p’Alonso poco tenía que ver coles rises de les redes sociales, y la relación col equipu acabo tan rota que decidió abandonar la estructura pa xunise a Aston Martin, un nueva etapa na que Fernando pueda redimise de los erros de los sos equipos y el so mal güeyu a la de decidir pa quien correr y qu’ufiertes aceptar.

Nel Dos Santos