Parte metereolóxicu 21 de febreru 2023
@eltiempunasturies
Bonos díes, bona xente.
Alborecemos col cielu nuboso y cae dalguna gotera nel estremu más ocidental d’Asturies con unes temperatures que tan alrodiu de los 11ºC, rexistrándose nel puirtu Payares 4,7ºC.
Güei vamos tener el cielu nuboso con nubosidá de desendolque que pela tarde pue dexanos xarabatos de calter tormentosu, más probables na fastera ocidental con unes temperatures que van caltenese suaves ya con una cota de nieve que va tar perriba de los 2000m. L’aire sedrá sele ya variable.
Mañana miércoles seguiremos col cielu nuboso y dalguna precipitación feble ya dispersa pela mañana. Yá al escurecer cola llegada d’una masa fría y húmeda les precipitaciones van dir coyendo fuerza y les temperatures entamarán a descender bultablemente, asina como la cota de nieve qu’anicialmente va tar perriba de los 1800m pa situase al finar el día perriba de los 700m. L’aire sedrá del norte-noroeste con dalguna racha moderada en zones altes ya en puntos del llitoral.
El xueves la masa d’aire fríu s’intensifica provocando precipitaciones abondoses y persistentes que sedrán de nieve tan solu perriba de los 300-400m, dalgo más baxo nos valles del interior asturianu por mor de los desplomes orográficos pola intensidá y persistencia de les precipitaciones, amás nel llitoral vendrán acompangaes de truena y xarazu con unes temperatures que van seguir descendiendo ya col aire que sedrá del norte-noroeste sele en xeneral con dalguna racha moderada en zones altes.
El vienres seguiremos coles precipitaciones anque les temperatures subirán llixeramente con una cota de nieve que rondará los 500-700m.
La fin de selmana seguiremos con tiempu ivernáu pero esto yá lu diremos viendo.
Semeya del nuesu collaciu Zaquiel dende Llanera, asina atapecía l’otru día.
Que paséis un bon martes collacies ya collacios y dir preparándose pa la nieve que va visitanos esti xueves a munches zones d’Asturies.
This work is licensed under a Creative Commons Attribution 4.0 International License.
