El documentu, centráu en guetar soluciones práutiques y concretes al desequillibriu territorial d’Asturies, recueye sesenta propuestes estremaes n’ochu estayes que ya foron presentaes al Gobiernu d’Asturies

El documentu “60 propuestes de política xeneral y compensatoria pa l’Asturies periférica” ye’l resultáu d’un grupu de trabayu formáu por ciudadanos independientes y por militantes n’Andecha Astur qu’aconceyaron pa envalorar la situación de los conceyos más alloñaos del cientru xeográficu, discriminaos demientres décades polos socesivos gobiernos y colos que consideren qu’Asturies tien una delda hestórica.

Les sos conclusiones son qu’hai falta meyorar n’ocho aspeutos básicos, recuperar población, comunicaciones y enerxía, sanidá pública, ensiñanza, organización social del curiau, economía tradicional, turismu caltenible y réxime fiscal. Alrodiu d’estos temes faen propuestes cencielles y factibles que, d’aplicase, ameyoraríen la economía y la vida de les persones qu’habiten la periferia, atrayendo amás a población de vuelta. 

“El documentu demuestra que la situación d’Asturies tien igua, y la de los sos conceyos más estremaos tamién. Hai alternatives viables y xente con puxu pa llevales a cabu.  Tamos énte un trabayu centráu en dar soluciones, en señalar polítiques pal requillibriu que son tan necesaries  comu posibles” declaraba’l voceru d’Andecha Astur.

Pa que quede nidia la so intención de qu’estes propuestes se desendolquen, presentaron en rexistru la documentación correspondiente pa facer aportar a Adrián Barbón estes propuestes, convidándolu a adoutales y poneles en marcha darréu. Comu anéudotes, pa realizar esta xestión alcontraron problemes por presentar la documentación n’asturianu, por mor del desconocimientu llegal del funcionariu qu’atendió la entrada en rexistru de la mesma, quien depués de ser debidamente informáu finó por aceutalo a trámite. Tamién se presentarán estes propuestes a les Cases de Conceyu afeutaes.

 Sicasí, nun consideren que’l documentu tea preslláu y conviden a participar ampliando o meyorando les propuestes, pa lo que tan poniéndose’n contautu con colleutivos sociales d’estos territorios.

Redaición InfoAsturies

This work is licensed under a Creative Commons Attribution 4.0 International License.