Aporta cola novedá de que cada persona va poder escribir la historia de so propia güela nes fueyes finales del llibru
Con más de 2.000 exemplares vendíos en dos años y mediu, ‘Güeli. Histories d’amor y remangu’ ye un llibru que ta algamando’l so oxetivu: homenaxear la historia de les güeles asturianes, eses heroínes anónimes que criaron, educaron y llucharon por dexanos un futuru meyor. La obra recueye 35 histories de güeles escrites poles sos nietes y nietos y la so quinta edición yá llegó a les llibreríes con una novedá; inclúi unes páxines finales en blanco pa que quien tenga’l llibru puea escribir la historia de so propia güela y apegar una semeya d’ella.
Too entamó con un post nel Instagram de la marca de ropa Puru Remangu en marzu de 2020: “La historia de les nuestres güeles, tamién ye parte nuestra. Nun dexemos que s’escaezan les sos vivencies, les aventures, les penuries d’una guerra. Fala con to güela, escribi la so historia”. La idea enllenó esta rede social coles esperiencies d’Olvido, Saluda, Esther, Ángeles, Marina, Julia y otres tantes muyeres anónimes qu’hasta agora nun recibieron nengún homenaxe públicu, pesie a ser una parte imprescindible de la nuestra historia.
L’éxitu d’esta iniciativa y el componente emocional y históricu merecía qu’estos testos nun quedaren namás n’Instagram y por eso Puru Remangu -col permisu de caduna de les y los autores-, decidió compilar les 35 narraciones nel llibru ‘Güeli. Histories d’amor y remangu’. A lo llargo les sos 96 páxines puen lleese vivencies como les de deprender a montar en bici, viaxar a Venecia, emigrar a Francia, trabayar de carbonera o nuna fábrica de conserves, montar un cine na cuenca del Nalón… Histories escrites dende’l cariñu, que representen a toa una xeneración y que gracies a esti llibru tán quedando pa la posteridá.
Redaición InfoAsturies
This work is licensed under a Creative Commons Attribution 4.0 International License.
