Tres de los munchos atentaos carecios nel pasáu por miembros d’ Iniciativa pol Asturianu, agora ye n’Ast la que ta nel puntu de mira de los españoles más belixerantes

Va xusto un añu que Cuatro Gotes, la productora de televisión alministrá por Inaciu Galán es-presidente de l’asociación en defensa l’asturianu, Iniciativa pol Asturianu, veíase forciá a istalar cámares de seguridá delantre la puerte pa defendese de los ataques de los enemigos del asturianu. Entós el desencadenante de los ataques fueren les declaraciones del diputáu de la formación ultra española, Ignacio Blanco, citando a Galán na Xunta Xeneral. Inaciu Galán careció entós insultos, menacies y ataque contra la so propiedá ya’l so llugar de trabayu.

Agora son los miembros de l’asociación en defensa l’asturianu n’Ast los que reciben insultos y menacies.

Nun ye daqué nuevo y les amueses de dispreciu por parte de seutores ultraespañolistes son avezaos, polo xeneral al traviés de mensaxes privaos, lo que llevó a la organización a quitar la opción d’unviar mensaxes.

Sicasí, optaron entos por facer públiques les sos opiniones ya’l tonu de les pallabres ellevóse considerablemente tres d’espublizar n’Ast un post felicitando al pueblu asturianu pola meyora nel posicionamientu llingüísticu del so idioma nel barómetru de les llingües mundiales -qu’alluga al asturianu nel puestu 50-.

Nun ta nidio si lo qu’ofendió a esta xente ye’l bon llugar del asturianu, sumáu a la noticia del espoxigue llingüísticu de les grandes urbes asturianes, o’l comentariu de n’Ast, nel que s’apuntaba al “PSOE y otros partios sucursalistes” comu responsables de la represión llinüística y les torgues a la oficialidá. En cualisquier casu los comentarios recoyíos son inadmisibles y denoten el nivel cultural y personal de les persones que los escriben.

Redaición InfoAsturies

This work is licensed under a Creative Commons Attribution 4.0 International License.