onos díes, bona xente.

Alborecemos con dalgún intervalu de nubes medies y altes que ta entemcíu ente dellos claros con unes temperatures mui condicionaes pol vientu ábrigu, rondando los 19ºC en munches zones d’Asturies, rexistrándose nel puirtu Payares 6ºC.

Güei va caltenese’l cielu nuboso cola posibilidá de que caiga dalguna gotera o xarabatín feble ya dispersu, siendo más probables na fastera más surocidental d’Asturies y cordelera onde nun se descarta que tengan calter tormentosu. Les temperatures mui suaves por mor del vientu ábrigu que va soplar con fuercia nes zones altes ya en puntos del llitoral.

Mañana xueves lo más destacáu sedrá l’aire que va dir coyendo entovía más fuerza y pue soplar con raches mui fuertes en zones altes y llitoral, sobre too a últimes hores. Les tempertures descenderán llixeramente y nel cielu tendremos nubes ya claros, tando la nubosidá más compacta nel surocidente y cordelera onde hai la posibilidá de precipitaciones febles ya disperses.

El vienres seguiremos baxo esta situación de vientos ábrigos qu’al pasu pela cordelera, como ye vezu, provocarán l’efeutu foehn, faciendo que medren bultablemente les temperatures n’Asturies con másimes que rebaxarán ampliamente los 20ºC.

El sábadu la nubosidá sedrá más abondosa ya tendremos precipitaciones más xeneralizaes anque seguirán siendo febles con unes temperatures en descensu ya col aire que tenderá a ser gallegu con intensidá fuerte, sobre too en zones altes ya en puntos del llitoral.

Paez que’l domingu amenorgará’l vientu, tendremos nubes ya claros y subirán de nuevu les temperatures.

Feliz y reivindicativu día de la Muyer, que paséis un bon día collacies.

Semeya del pueblu teberganu de Taxa, semeya que mos l’apurre’l nuesu collaciu Luis Alfredo.