Con 73 conceyos en riesgu altu o peraltu d’incendiu, el gobiernu d’Asturies sigue ensin contratar bomberos

14 Marzu, 2023

Bomberos d’Asturies: “La evidente falta d’un mínimu de personal nes dotaciones de los parques de Bomberos del Serviciu d’Emerxencies del “Principado de Asturias“, xunío a la falta d’una organización con un mínimu de xacíu y respetu pola profesión de Bomberos, pue acabar costándonos la vida tarde o temprano”

Asturies entama la primavera amburando, con más de venti incendios entamaos esti fin de selmana, de los que dellos finaron por amatase gracies a la lluvia; fálase d’incendios intencionaos. Güei 13 conceyos tan en riesgu peraltu d’incendios y otros 60 en riesgu altu.

Entantu los Parques de Bomberos asturianos tan pocu menos que vacíos, siendo avezao que se manden dotaciones de namás dos o incluso una persona a amatar incendios , poniendo en riesgu la so vida más de lo que ya lo fae la so profesión.

Amás, la escasez de personal “cúbrese” desplazándo bomberos d’unos cientros de trabayu a otros, complicando’l so trabayu al alcontrase’n situaciones de riesgu nuna xeografía que nun conoz, nun cientru de trabayu que nun conoz y con compañeros que nun son del so grupu de trabayu.

Los bomberos reclamen mayor dotación de personal y denuncien direutamente al gobiernu y a la FSA PSOE de la situación que carecen “con estes condiciones de vientu, Asturies ardiendo… y el gobiernu ¿A qué esperen? ¿A qué un día volvamos del trabayu nun ataúd?.

Comu exemplu de la nefasta xestión de los ya escasos recursos, los bomberos denuncien la utilización de 20 camiones de bomberos nun actu elleutoral del FSA-PSOE. Los vehiclos foron desplazaos de Llanera a Avilés por trabayaores del Serviciu d’emerxencies pa que se lluciere el presidente na semeya, mientres namás 4 Bomberos de guardia quedaben abandonaos a la so suerte p’atender les emerxencies de 130.000 habitantes y tola industria de la zona. Los camiones de la semeya en realidá mercáronse por decision xudicial depués de que’l “Principado” tratare de desviar pa otros usos les perres destinaes a la so compra.