La Llei, que previsiblemente va salir adelantre mientres los próximos díes, permitirá actividaes empresariales nel mediu natural, col únicu requisitu d’una declaración responsable y ensin evaluación ambiental previa
El gobiernu asturianu aprebará una Llei de Calidá Ambiental ensin consensu social que na so tramitación y ellaboración ignoró los colectivos ecoloxistes y conservacionistes asturianos, colos que nun se faló nin se consensuó nengunu de los sos puntos, al contrariu de lo anunciao pol vicepresidente del Principado na so comparecencia na Comisión d’Alministración Autonómica, Mediu Ambiente y Cambéu Climáticu del pasáu 6 de xunu.
Les organizaciones aportunen en qu’Asturies precisa la so propia Llei d’Evaluación d’Impactu Ambiental, como un preséu preventivu, non una Llei calidable Ambiental que yá ñaz anticuada dende los sos entamos, incluyendo figures llegales apocayá derogaes ya incorporando procedimientos y conceutos que podríen inclusive frayar principios o normes llegales europeos y estatales. Parte del so articuláu ta basáu nes derogaciones o retayos nes garantíes ambientales que yá introducía la recién Llei del Principáu d’Asturies 4/2021, de 1 d’avientu, de Midíes Alministratives Urxentes, cuestionada inclusive pola Alministración Xeneral del Estáu.
Pa los grupos ecoloxistes asturianos trátase d’una llei regresiva que llueñe d’entainar los procedimientos y ampliar les garantíes de caltenimientu del mediu ambiente, favorez ciertos intereses empresariales, imponiendo a los pequeños promotores y a los conceyos una carga burocrática y de responsabilidaes inasumible. Resta, amás, les garantíes ambientales qu’una evaluación previa del impactu de les actividaes o instalaciones que se desenvuelven nel medio natural precisa. Per otru llau, pretende dexar en manos de los conceyos tola responsabilidá, les cargues burocrátiques y el llabor inspector y sancionador en materia d’incidencia ambiental de les actividaes o instalaciones desendolcaes nel so conceyu.
La llei tampoco inclúi mecanismos pa restaurar la llegalidá ambiental incumplia y reparar el dañu ambiental producíu. Llueñe d’incorporar la obligatoriedá de restaurar el dañu ambiental causáu, la norma propón n’una de les sos disposiciones adicionales una especie d’amnistía fiscal ambiental” pa esimir de la obligación d’afitar garantíes financieres a les empreses o promotores que desendolquen actividaes que pueden causar daños al mediu ambiente, siempres y cuando estos daños nun superen los 3.000.000 d’euros.
Tamién contempla, pente otres coses cuestionables, que les actividaes d’investigación o esperimentación “nun van riquir sometese al réxime d’autorización ambiental integrada”, lo cual ye por demás peligrosu porque s’abre la puerte al desendolcu de productos o procesos que podríen tener un grave impactu ambiental, amparándose nel so calter esperimental y ensin nin siquiamente incluyir como requisitu que tengan de ser actividaes de “escasa incidencia ambiental”.
En materia de meyora de la participación pública, la nueva llei anuncia la creación d’un Conseyu Rexonal de Mediu Ambiente del Principáu d’Asturies”, conseyu que yá foi creáu en 1991 y que dempués de 20 años ensin convocase foi esaniciáu por aciu una derogación por decretu. Esta llei llíndase a repitir la so creación, ensin que s’atopen xustificaciones, o midíes especiales de fomentu pa una participación que nun esistió hasta la fecha. Tampoco ameyora la participación col amenorgamientu drásticu de plazos na presentación de suxerencies o allegamientos, polo que la mesma ciudadanía nun va poder exercer llibremente y con garantíes una afayaiza participación. “Nun ye lo mesmo -apunten les organizaciones- “información pública que “participación pública” y de na sirve un Conseyu formáu mayoritariamente por personal político o de l’alministración, onde la sociedá civil tien acutáu’l so poder de participación y de decisión”.
Denuncien que se trata d’una norma llegal con munches indefiniciones, que solo va provocar inseguridá xurídica y que retaya les garantíes de participación pública de la ciudadanía, escaeciendo amás los grandes retos a los qu’enfrentamos na actualidá: la crisis de la biodiversidá y la llucha contra’l cambéu climáticu.
A lo último, les organizaciones destaquen qu’esti anteproyectu fai una clara delegación de funciones y competencies nos conceyos y promotores. A los primeres impon-yos una gran carga burocrática y técnica, teniendo qu’inspeccionar a posteriori les instalaciones o actividaes consideraes de “menor incidencia ambiental”, ensin evaluales primeramente, y puestes en marcha por aciu una declaración responsable de el promotores. Esta indefinición, non esclariada nel anteproyectu, de lo que ye esa “escasa incidencia ambiental”, podría suponer una amenaza pa la salú de les persones y los ecosistemes, yá que podríen autorizase proyectos bien atanantes como por casu una cantera, ensin que s’evalúe primeramente’l so impactu y ensin que vecines y vecinos afectaos puedan alegar o participar nel procesu d’aprebación.
Mientres, a los promotores o titulares d’actividaes empresariales, desíxese-yos que por aciu la declaración responsable manifiesten que so la so responsabilidá tán cumpliendo colos requisitos establecíos na llexislación ambiental europea, estatal, autonómica y local, añediendo una gran inseguridá xurídica, cuidao que primero taríen invirtiendo pa empecipiar la so actividá y depués fadríase-yos les inspecciones per parte de los técnicos municipales con posterioridá al entamu de la so actividá.
Canteres, gasolineres, depuradores, plantíos d’ocalitos, subestaciones llétriques, antenes, pistes forestales y turístiques son dalgunos de los exemplos d’actividaes o instalaciones qu’esti anteproyectu del gobiernu asturianu propón “entainar”, pa regular por aciu una “Declaración Responsable”, que van inspeccionar los conceyos a posteriori, y al que vecinos y vecines de la zona y ciudadanía polo xeneral nun van poder realizar allegamientos o negase al desendolcu de l’actividá.
Roblen el documentu de refuga la Coordinadora Ecoloxista d’Asturies, Colectivo Ecologista de Avilés, Asturies por un Aire Sano. Conceyu contra la Incineración. Plataforma medioambiental de la Comarca de Avilés, Plataforma contra la contaminación de Xixón, La Plataforma Antitérmica La Pereda, Coordinadora Ornitoloxica d’Asturies, Asociación Ereba Ecología y Patrimonio, Asociación Medioambiental la Cirigueña, Asociación Geotrupes, Asociación Asturiana de Amigos de la Naturaleza, Plataforma Oro Non, Instituto para la Calidad y la Educación Ambiental, Grupo Naturalista Mavea, Plataforma por la Defensa de la Cordillera Cantábrica, SOS Cuideiru, Amigos del Tejo y las Tejedas, Ecoloxistes n’Aición d’Asturies, Plataforma Vecinal contra las plantas de asfalto y de hormigón por un Oviedo Saludable, Plataforma Xente de Noroccidente, Asociación Salvemos los territorios del Bajo Navia, Asociación Socioambiental Biodevas, Asociación Medioambiental Ecos Astures, Plataforma Xente de Oscos-Eo, Greenpeace Asturias, Conceyu del Texu, Prolobos Asturias, Rebelión Científica Asturies, Plataforma un Pulmón para el Solaron y SEO/BirdLife.
Alberto Rodríguez
This work is licensed under a Creative Commons Attribution 4.0 International License.
