Col espediente abiertu a Rubén Rosón sumen quince los espedientaos en Podemos Asturies, toos integrantes del seutor críticu, al que por ciertu pertenez tamién la candidata escoyía polos militantes
El gota a gota continúa en Podemos, dexando en partíu namás a los fieles a la direición estatal del mesmu, que va quitando d’en mediu toa oposición.
Nesti casu toca a Rubén Rosón, conceyal n’Uviéu y averáu al escoordinador del partíu n’Asturies, Daniel Ripa. La noticia de que ta siendo sometíu a investigación aportó-y pel mail, ensin que se-y detallaren fasta agora los motivos de los mesmos. En situación asemeyao tan quince miembros de la formación morá, seique por agora son siete los que se fexeron públicos: Los Daniel Ripa, Andrés Fernández Vilanova, Jorge Fernández, Rogelio Crespo, Francisco Suárez, María Covadonga Colubi y agora Rubén Rosón.
L’espediente vien dende la direición estatal, de parte del Comité de Seguridad y Salud, un órganu cuyes funciones tan relacionaes con prevenir los riesgos llaborales y analizar los daños producios na salú ya integridá física de la plantilla, lo qu’enguedeya más les coses puesto qu’elli nun tien nin tuvo relacion de calter llaboral col partíu.
En declaraciones a la prensa Rosón afirmó qu’el so espediente ensiértase na estratexa de Podemos d’espulsar a quienes “nun siguen el so dictáu”, reconociendo el calter antidemocráticu que define esti partíu. Nes mesmes coincidió tamién cola visión de Daniel Ripa, que na entrevista caltenía con InfoAsturies declaraba que “Nun se tien la mayoría na organización y quier gobernase pola fuerza y reinar sobro les cenices”. Rosón aporfió nesa idega,nel so twitter “Espedientes, sanciones y purgues. Quienes tan enrocados nel so beneficiu personal contra’l beneficiu colectivu nun saben otru llinguaxe. Con tal de facese col timón -refiriéndose al seutor llideráu por Sofía Castañón y Rafa Palacios- son capaces de quemar tola nave. Venimos par tresformar. Podemos nun yera esto.”
Redaición InfoAsturies
This work is licensed under a Creative Commons Attribution 4.0 International License.
