Andecha Astur fadrá un actu remembrativu esti sábadu, na mesma Sala Capitular onde, güei va 209 años, tuvo llugar el primer actu d’autodeterminación d’Asturies na época contemporánea

Más de dos sieglos depués ye mester remembrar ún de los acontecimientos más desconocios pola población ya’l tiempu más interesantes y motivadores de la Hestoria d’Asturies, non sólo polos fechos en sí, sinón polo que representaron y polo muncho que mos cuenten del sentimientu identitariu y defensor de la llibertá de los asturianos a lo llargo la hestoria.

El 9 de mayu de 1808 aportaron a Uviéu les órdenes pa sometese a la ocupación francesa y la noticia del fusilamientu de dellos asturianos nel 2 de mayu, lo que prevocó la indignación de los asturianos que, poco dimpuestos a acatar les ordenes,  presionaron a los diputaos de la Xunta Xeneral a rebelase frente al poder francés.

Sicasí, los diputaos retractaronse a los pocos díes de la decisión tomada esi díe, daqué que’l pueblu nun diba consentir, ya’l 25 de mayo de 1808 miles de campesinos ya estudiantes (pente los que queda memoria de dos muyeres, Xuaca Bobela y Marica Andayón) asaltaron la fábrica d’Armes d’Uviéu, entrando armaos na capital. Tomaron l’Audiencia y costituyeron un nueu órganu de gobiernu, la Xunta Suprema, autoproclamada soberana.

Tres de xurar la soberanía popular, ello ye, que «el poder, tou el poder, reside y procede del pueblu» asumieron tolos atributos d’un estáu soberanu, talos como la bandera, exércitu propiu (l’Exércitu Defensivu Asturianu, con 30.000 homes de tolos conceyos) ministerios y embaxadores. Darréu, declararon la guerra a Napoleón Bonaparte unviando a Llondres una embaxada pa pedir sofitu militar.

Foi M.G de Xovellanos quien recibió l’encargu de diseñar una bandera propia, que, con dalgunes variaciones respeutu al diseñu orixinal, siguimos usando. Aquella tinía un añadíu prestosu: llevaba grababa, en lletres doraes, la frase ‘Asturies nunca vencida’. Como datu interesante diremos qu’España nun tinía entá d’aquella más bandera que la d’usu militar.

cuando al otru añu una intervención militar punxo fin a la Xunta Soberana, la llinia argumental de Xovellanos na so defensa foi el fechu de que la Xunta asturiana ye preesistente a la española, porque tien sieglos d’antigüedá, y polo tantu aquella nun tien autoridá pa disolvela, pero nun consiguió con ello caltener la nuesa soberanía.

Andecha Astur cellebra tolos años nesta fecha’l so “Díi d’Andecha”, retrasando los actos a esti sábadu, cuando la organización cellebrará n’Uviéu, de magar les 13.30 hores, un actu baxo’l llema “Un Pueblu Vivu, una Asturies Llibre”. Nel actu afondará na reivindicación de la declaración de Soberanía de la Xunta Suprema en 1808 como primer actu d’autodetermín d’Asturies na dómina contemporania, presentando una iniciativa nesti sen na Xunta Xeneral. Darréu fadráse un actu d’homenaxe colocándose un ramu lloréu a les puertes de la Sala Capitular, onde tuvo llugar la declaración de Soberanía.

Llucía F. Marqués

This work is licensed under a Creative Commons Attribution 4.0 International License.