Güei alborecemos col cielu dalgo empuercáu de nubes altes ya con unes temperatures que tan alrodiu de los 7ºC, rexistrándose nel puirtu Payares 7,1ºC onde sopla molestu’l vientu ábrigu.

Esti llunes vamos tener un día sele en xeneral con dalgo de nubosidá alta, sobre too pela mañana, tando más escampláu pela tarde ya coles temperatures que van caltenese suaves con ascensos nidios en zones de montaña ya interior, dalgo menos apreciable nel llitoral por mor de les brises costeres, nel restu l’aire sedrá sele ya variable.

El martes vamos tener un día mui asemeyáu con dalgo de nubosidá pero esta vegada les nubes sedrán más abondoses durante la tarde y les temperatures van caltenese sin grandes camudos o descensos llixeros. L’aire seguirá siendo sele ya variable y les brises na costa condicionarán dalgo les temperatures másimes nel llitoral.

El miércoles la nubosidá sedrá más abondosa ye’l día va quedar nuble con un llixeru descensu de les temperatures másimes pero nun tendremos precipitaciones y l’ambiente seguirá siendo afayaizu, amás l’aire va seguir sele ya variable.

Paez que’l xueves podemos tener dalgo más de movimientu atmosféricu con nubosidá de desendolque que pue dexar xarabatos febles ya dispersos de calter tormentosu durante la tarde, más probables en zones de montaña con unes temperatures másimes nidiamente más altes.

El vienres seguiremos con cierta inestabilidá y los xarabatos de calter tormentosu puen ser más probables ya intensos, amás les temperatures van a iniciar un descensu, anque esti día veremos dalgo’l sol y el cielu nun va tar del too nuble.

El sábadu paez que l’aire pue dir coyendo fuelle y soplar con fuercia en zones altes ya en puntos del llitoral, amás les temperatures siguen en descensu anque les precipitaciones sedrán poco probables ya disperses y nel cielu seguiremos viendo dellos claros.

El domingu sedrá mui asemeyáu sicasí l’aire pue dir amenorgando durante la tarde y la cota de nieve rondará los 1800m pero esto yá lu diremos viendo.

Que paséis un bon llunes collacies ya collacios.