Dir de chigres, fiesta de práu y espicha, les tres formes de consumu sidreru por antonomasia nun solu díe, acompañaos siempres pol gaiteru y con barra llibre, garantizando los desplazamientos seguros n’autobús y con parada cultural, too ello axuntao na esperiencia sidrera más intensa y que lleva 20 años cellebrándose: Sidracrucis

Vienres Santu. 12:00 la mañana, hora’l vermú, aconceyes con collacios -o solu, nel Sidracrucis vas topar siempres compañía- na sede xeneral de la Revista LA SIDRA, onde s’inagura oficialmente’l Sidracrucis colos primeros culinos, mientres recibes la identificación personalizao, les istruciones y un cursu rápidu en cancios de chigre coles notes del “Xermanín, échame un culete”, himnu oficial del Sidracrucis. Sigues tomando sidre cuando’l gaiteru entama a tocar, la procesión más sidrera ponse en marcha.

Vas a un chigre, barra llibre de sidre, pinchos asgaya. Vas a otru chigre, a otru… lo mesmo en caún. Recuerda que ca vegada que suene “Adiós col corazón” cambies de chigre. Subes entós al bus, vas a una fiesta de práu. Un tonel a la entrada, pa recibite, y otros cuantos pel práu, amás de la barra con sidre de decenes de llagares, música, xaréu, una bolsa-picnic pa reforzar y tola sidre que quieras. A eso de les cuatro faes un descansu pa poder resistir la xornada: viaxe a Nava y visita al Muséu de la Sidre (opcional, si prefieres quedes fuera’l muséu con una pipa sidre). Y lluéu, otra vuelta de chigres, barra llibre, pinchos, agora per Nava. El puntu final pónlu una espicha en toda regla, otra fartura con más sidre. 

Cualquiera que tomare sidre sabe qu’esto va necesariamente xunío a muncha folixa, munches rises, muncha música ya’l meyor ambiente posible, un plan perfechu pa cellebrar la Semana Santa a la asturiana que puen esfrutar tanto sidreros veteranos comu amateurs con ganes de somorguiase de guelpe nel universu sidreru. Una esperiencia única. 

Esi ye’l plan qu’ufren dende la Revista LA SIDRA y la Fundación Asturies XXI pa esti 7 d’abril, Vienres Santu, la información ta disponible na páxina web de la revista. Recomienden apurase a garrar sitiu, les places tan llendaes. 

El percorríu y los horarios, suxetos a posibles variaciones va ser el que vien darréu:

• 11:30 Pza Gral Primo de Rivera Uviéu
• 12 A 12:30 oficina LA SIDRA, repartu de credenciales, istruciones y primeros culinos. Ensayu del Xermanín. Xixón
• 12:30 a 13:00 h.      Sidrería El Saúco                                                      Xixón
• 13:00 a 13:30 h.      Sidrería Parrilla Antonio I                                  Xixón
• 13:30 a 14:00 h.      Sidrería La Montera Picona de Ramón         Xixón
• 14:30 a 16:30 h.      XII Primer Sidre L’Añu. Avituallamientu
• 17:00 a 17:45 h.      Muséu de la Sidre               Nava
• 17:45 a 18:15 h.    Sidrería Florida                  Nava
• 18:15 a 18:45 h.     Sidrería Plaza                     Nava
• 18:45 a 19:15  h.     Sidrería Prida                    Nava
• 19:45 a 22:00  h.     Espicha en Llagar           Xixón
• 22:00 h.      Torna pa Xixón y Uviéu

Redaición InfoAsturies

This work is licensed under a Creative Commons Attribution 4.0 International License.