Bonos díes, bona xente.
Alborecemos col cielu cubiertu por nubes baxes na metá norte d’Asturies con dalgo tamién de nubosidá alta nel restu con unes temperatures que tan alrodiu de los 12ºC, rexistrándose nel puirtu Payares 3,8ºC.
Güei martes los estratos y nubes baxes de la fastera central asturiana pali que pali van dir dixebrándose pa dexanos el cielu con nubes ya claros. Les temperatures van seguir mui suaves ya inclusu ascenderán moderadamente les mínimes por mor de les nubes baxes de l’alborada. L’aire sedrá sele ya variable y seguirán les brises pela costa.
Mañana miércoles la llegada d’un frente fríu mui activu de la mano d’una vaguada atlántica va apurrinos precipitaciones y xarabatos de calter moderáu durante la mañana con tendencia a remitir y abrise dellos claros pela tarde, amás estes precipitaciones vendrán acompangaes d’un descensu bultable de les temperatures, faciendo que la nieve pueda surdir perriba de los 1300m. ya inclusu más baxo pero yá sin malpenes precipitaciones. L’aire sedrá de componente noroeste con raches fuertes en zones altes ya en puntos del llitoral.
El xueves tendremos el cielu nuboso pero nun s’eperen malpenes precipitaciones, sicasí pue cayer dalguna gotera dispersa ya ocasional. L’aire seguirá soplando con fuercia en zones altes ya en puntos del llitoral y les temperatures van caltenese fríes.
El vienres paez qu’arrecia l’aire con raches mui fuertes en zones de montaña ya en puntos del llitoral, siendo gallegu y faciendo que suban dalgo les temperatures, nun s’esperen precipitaciones salvo na fastera más surocidental, nel restu predominarán les nubes ya los claros.
El sábadu baxarán dalgo les temperatures, col cielu nuboso pero amenorgando l’aire y el domingu predominarán los grandes claros y volverán a subir les temperatures.
A más llargu plazu sigue sin vese una situación de lluvies abondoses y persistentes, pero esto yá lu diremos viendo.
Que paséis un bon martes collacies ya collacios.
Semeya que mos l’apurre la nuesa collacia Ainoa, atapecer na sablera de Salines.
This work is licensed under a Creative Commons Attribution 4.0 International License.
