La reducción de les plantíes, recursos y ufiertes formatives de los Centros a la so mínima espresión imposibilita la correcha prestación de los servicios que se supón tienen qu’ufrir y permite al tiempu que sindicatos, patronales y academies privaes se llucren, cobrando fasta 2500 € por impartir formaciones sovencionaes que los Centros del SEPEPA tendrien que tar atendiendo de baldre
La formación nacionaliega pidi a Fiscalía qu’investigue al Conseyeru d’Industria, Emplegu y Promoción Económica, Enrique Fernández Rodríguez, y a la Direutora-Xerente del Serviciu Públicu d’Emplegu (SEPEPA), por un supuestu delitu de prevaricación y otru de malversación por minimizar l’actividá de los Centros Propios de Formación pal Emplegu, entregando esta actividá a sindicatos, patronales y academies privaes, pa que se llucren.
El SEPEPA creóse en 2005 col envís de reducir el desemplegu n’Asturies, siendo pa ello perimportante’l so llabor de dar formación a los desemplegaos pa que puean aceder a los puestos de trabayu disponibles. Pa ello, cunta con Centros Propios de Formación pal Emplegu n’Uviéu, Xixón, Llangréu y Avilés, encargaos d’impartir esta formación que permita la inserción nel mercau llaboral.
Andecha Astur denuncia la progresiva perda capacidá d’estos centros pa cumplir el so llabor d’ufrir la formación llaboral, público y de baldre necesario y considera qu’esto nun ye casual, sinón a costafecha pa beneficiar a entidaes privaes y sindicatos que presten estos servicios obteniendo beneficios por ellos.
Asina, denuncien que’l SEPEPA nun cubre les vacantes de profesoráu nin ordenances xubilaos, nun teniendo ya personal foncionariu estable y siendo necesaria la intervención de los tribunales pa que se renovaren los contratos del personal llaboral. De fechu, agora mesmo el SEPEPA furrula cuasi dafechu con personal autónomu que trabaya en condiciones de precariedá, mala retribución y males condiciones llaborales.
Tampocu no material respuenden afayaizamente, ñegándose en varies ocasiones a facilitar a los Centros los materiales necesarios pa impartir formación, faciendo imposibles dalgunos cursos.
El resultáu ye un retayu xabaz de les places y cursos ufiertáos, polo que dende Andecha Astur acusen al Conseyeru d’Industria y la Direutora del SEPEPA de dexación de fonciones y mala xestión de los Centros Propios de Fomación pal Emplegu en materia d’impartición de formación pa titular colos Certificaos de Profesionalidá, que resulten fundamentales pa multiplicar les ociones d’acesu al mercáu llaboral, al reconocer les nuees cualificaciones profesionales requiries poles empreses.
Estos Certificaos pueden conseguise, sicasí, na formación privao, de la que s’encarguen sindicatos, organizaciones d’empresarios y academies privaes, entidaes que reciben amás del SEPEPA sovenciones pa dar los cursos qu’ellos nun ufierten, siendo asina que una persona que consigue plaza sovencionada tien que pagar alrodiu de 2.500 € pa conseguir una formación a la que tien drechu de baldre.
Mentantu, remembren dende Andecha, Asturies llidera la tasa estatal de paraos de llarga duración: un 35%, sumando ya 21.000 paraos de llarga duración mayores de 45 años (1 de ca 3 paraos), de perdificil reinserción llaboral. “Y un 25% los asturianos tán en riesgu de probitú. Énte esta sangrante rialidá, ye muncha la mocedá asturiano que se ve forciao a emigrar, sólo pa garantizar el poder desenrollar un proyeutu vital en condiciones de dinidá”.
Alberto Rodríguez
This work is licensed under a Creative Commons Attribution 4.0 International License.
