El multitudinariu manifestamientu que percorrió les cais de Xixón esti Primeru de Mayu aconceyó a dellos miles de persones contra la precariedá ya’l desemplegu.

Destacó la presencia del bloque d’Asturies Insumisa, que na so primer apaición nes cais foi quien a aconceyar alrodiu mil participantes

A la convocatoria llanzada por SUATEA, CGT, CNT y CSI acudieron alrodiu de 4.000 persones. Amás de les organizaciones convocantes, participaron nel manifestamientu Asturies Insumisa, Andecha Astur, Anticapitalistes, Aina,  la Coordinadora de Pensionistes, la Plataforma de Trabayaores d’Ayuda a Domiciliu,, el Sindicatu d’Estudiantes, el movimientu vecinal contra la planta de Pirólisis na zona oeste de Xixón, refugiaos saharauis y colombianos y Riders en llucha, pente otres.

Na marcha, que discurrió dende la Plaza l’Humedal fasta’l Náuticu, glayáronse conseñes llamando a la llucha pol futuru d’Asturies. Les sindicalistes de la Suiza, que podríen entrar na cárcele por facer sindicalismu, foron tamién protagonistes de los llemas glayaos.

This work is licensed under a Creative Commons Attribution 4.0 International License.