Dende la prúa a la turbonada, pasando pel orpín, l’orbayu, l’albadíu o’l cierzu, n’Asturies tenemos cerca venti pallabres pa falar de la lluvia, asina que se m’ocurran de sópitu
Ayeri por un intre paeció que’l bastiazu diba complicar el manifestamientu pola oficialidá, pero anque al final el Nuberu portóse y a les doce en puntu abocanó, los asturianos ya tiráremos de maxín -gaites con forru impermeable, paragües en cabás pa garrar la pancarta…- y tabemos preparaos pa salir, un añu más, a desixir los nuesos drechos llingüísticos.
Un añu más, demasiaos años más, siempres col suañu na pica los deos de que va ser el caberu; dalgún añu lo sedrá, creo que ya dexemos nidio que nun díbemos danos, que nun mos rendimos, que güei, mañana y siempres, el tolos ámbetos, falamos asturianu. Les más de diez mil presones qu’ayeri percorrieron la cai Uría yeren namás una amuesa de los cientos de miles d’asturianos y asturianes que tienen nidio la so llingua y que quieren ver reconocios los sos drechos, que tan fartos de discriminaciones.
El “sofitu” istitucional fízose sentir dende l’entamu: el Conceyu d’Uviéu multare ya a primera hora a la furgoneta de soníu de la Xunta Pola Defensa la Llingua, convocante del actu, anque la so presencia taba previamente comunicada a la policía llocal. «Tenemos orde», dixeron los axentes, dando a entender que les istruciones d’entorpecer la bona marcha del manifestamientu veníen d’arriba.
Nun faltaron les pandereteres, colos sones camudaos pa la ocasión en llemes vindicativos, nin por supuestu los gaiteros y los rapacinos de Reciella, families pol Asturianu, colos sos globos de collores apuntando al futuru, un añu más. Nun faltaron, más ende tando a piques de les elleiciones, representantes y pancartes de dellos partios, inclusive de partios que discriminaron demientres años la llingua y d’otros que, tando en poder y pudiendo algamalo, conformáronse con declaraciones d’intenciones y semeyes de compromisu, pero sobre tou nun faltaron los que siempres tan y tuvieron dándolo too pol asturianu, los únicos que posibiliten el votu asturianu y n’asturianu… somos pocos y conocémosnos muncho, nun hai falta decir nomes.
Si teo de quedame con una parte de la intervención final que Natalia Suárez Ríos fexo tres del actu ye precisamente con esa, que cuando aporte’l momentu de dar el votu nes urnes nos alcordemos de quienes siempres llevaron l’asturianu per delantre nel so programa… y nel so díi ente díi.
¡Oficialidá darréu!
This work is licensed under a Creative Commons Attribution 4.0 International License.
