Bonos díes, bona xente.

Alborecemos con nubes ya claros y unes temperatures que tan alrodiu de los 10ºC, rexistrándose una temperaturea de 2,3ºC nel puirtu Payares.

Güei vamos tener intervalos nubosos entemecios ente grandes claros, sicasí a últimes hores aumentará la nubosidá cola posibilidá de dalguna precipitación feble ya dispersa. Les temperatures mínimes en descensu y les másimes sin grandes cambios y l’aire sedrá de componente noroeste con dalguna racha moderada nel llitoral y zones altes.

A partir de mañana xueves vamos entrar n’un periodu llargu de mal tiempu con precipitaciones frecuentes, descensu de les temperatures ya inclusu nieve pela cordelera. Anque entovía pela mañana van predominar les nubes ya los claros la nubosidá dirá n’aumentu pa dexanos precipitaciones febles durante la tarde, surdiento la nieve perriba de los 1700m con un descensu de les temperatures ya col aire de componente noroeste que va soplar con raches moderaes nel llitoral y zones altes.

El vienres la inestabilidá va dir a más con xarabatos frecuentes ya moderaos que puen tener calter tormentosu y ser de nieve perriba de los 1500m, l’aire seguirá siendo de componente noroeste y les temperatures en descensu.

El sábadu y domingu vamos tener nubosidá abondosa con precipitaciones intermitentes más probables el sábadu y con más claros el domingu con unes temperatures que camudarán poco’l sábadu y subirán dalgo’l domingu.

La selmana viniente presentase ivernal con precipitaciones , fríu y nieve pela cordelera pero esto yá lu diremos viendo.

Que paséis un bon miércoles collacies ya collacios.

Cumal de nome Polvoredo o Correcillas semeya fecha pol Pastorín de Xove