@eltiempunasturies
Bonos díes, bona xente.
Alborecemos col cielu cubiertu ya con xarabatos moderaos ya intermitentes con unes temperatures que tan alrodiu de los 10ºC, rexistrándos nel puirtu Payares 1,5ºC.
Güei vamos tener un día típicu d’iviernu, con xarabatos frecuentes de calter moderáu ya cola posibilidá de que vengan acompangaos de truena y xarazu nel llitoral, amás les temperatures descenderán y la nieve rondará los 1500m con vientu de componente noroeste sele en xeneral. Así na y too ente xarabatu y xarabatu podremos ver el sol.
Mañana sábadu va seguir la inestabilidá anque veremos más el sol y los xarabatos van ser más dispersos ya ocasionales con unes temperatures en llixeru ascensu ya col aire de componente norte, sele en xeneral.
El domingu sedrá un día mui asemeyá con intervalos nubosos entemecidos ente dellos claros, dalgún xarabatu dispersu y temperatures en llixeru ascensu.
La selmana viniente vamos seguir con esti tiempu invernal, sobre too de cara al martes onde les temperatures puen desplomase y la nieve baxar inclusu hasta los 1000m d’altor, pero esto yá lu diremos viendo.
Que paséis una bona fin de selmana collacies ya collacios.
La nieve torna a les cumes asturianes, ayeri asina taba’l Picu Urriellu.

This work is licensed under a Creative Commons Attribution 4.0 International License.