Andecha Astur caltién el testigu de los soberanistes de 1808 y comu seña d’esi compromisu convoca pal xueves 25 un actu d’homenaxe a la declaración de Soberanía
El 25 de mayu ye una fecha clave na hestoria d’Asturies. Esi díi, va 215 años, la Xunta Xeneral proclámase, baxo la presión del pueblu asturianu, soberana rebelándose escontra les tropes franceses qu’invadieren el país, asumiendo tolos atributos d’un estáu soberanu, talos como la bandera, exércitu propiu (l’Exércitu Defensivu Asturianu, con 30.000 homes de tolos conceyos) ministerios y embaxadores, consiguiendo l’Exércitu Defensivu Asturianu al traviés del unvíu d’embaxadores el sofitu d’Inglaterra, qu’apurrió material de guerra pa lluchar escontra les tropes de Napoleón.
Nesta declaración la Xunta Xeneral d’Asturies reconoz esplicitamente la soberanía popular asturiana, xurando caún de los sos componentes que “ El poder, tol poder, reside y procede del pueblu”, y declarando en consecuencia la soberanía ya independencia d’Asturies, no que costitúi’l primer actu d’autodetermín d’Asturies na dómina contemporánia y un nidiu actu d’afirmación de la capacidá d’Asturies de ser dueña del so futuru.
Andecha Astur garró dende un entamu el testigu d’esta Xunta, reclamando p’Asturies la mesma soberanía y pal pueblu el mesmu poder y pa simbolizar esa continuidá ca añu per esa fecha faen una ufrienda floral al par de la Sala Capitular na que la soberanía fore declarada. Esti añu sedrá el mesmu 25 de mayu, xueves, a les ochu la tardi.
Declaración de Soberanía del 25 de Mayu de 1.808
El 9 de mayu de 1808 aportaron a Uviéu dende’l gobiernu d’España les órdenes pa sometese a la ocupación francesa y la noticia del fusilamientu de dellos asturianos nel 2 de mayu, lo que prevocó la indignación de los asturianos que, poco dimpuestos a acatar les ordenes, presionaron a los diputaos de la Xunta Xeneral a rebelase ya inorar les órdenes.
Sicasí, la mayoría los diputaos retractáronse a los pocos díes de la decisión tomada, acatándo les istruciones, daqué que’l pueblu nun diba consentir. El 25 de mayu de 1808 miles de campesinos ya estudiantes (pente los que queda memoria de dos muyeres, Xuaca Bobela y Marica Andayón) asaltaron la fábrica d’Armes d’Uviéu, entrando armaos na capital. Tomaron l’Audiencia y col sofitu d’una parte de los diputaos costituyeron un nueu órganu de gobiernu, la Xunta Suprema, autoproclamada soberana.
Tres de xurar la soberanía popular, ello ye, que «el poder, tou el poder, reside y procede del pueblu» asumieron tolos atributos d’un estáu soberanu, talos como la bandera, exércitu propiu (l’Exércitu Defensivu Asturianu, con 30.000 homes de tolos conceyos) ministerios y embaxadores. Darréu, declararon la guerra a Napoleón Bonaparte unviando a Llondres una embaxada pa pedir sofitu militar.
Foi M.G de Xovellanos quien recibió l’encargu de diseñar una bandera propia, que, con dalgunes variaciones respeutu al diseñu orixinal, siguimos usando. Aquella tinía un añadíu prestosu: llevaba grababa, en lletres doraes, la frase ‘Asturies nunca vencida’. Como datu interesante diremos qu’España nun tinía entá d’aquella más bandera que la d’usu militar.
cuando al otru añu una intervención militar del exércitu español punxo fin a la Xunta Soberana, la llinia argumental dexada per escrito por Xovellanos na so defensa foi el fechu de que la Xunta asturiana ye preesistente a la española, porque tien sieglos d’antigüedá, y polo tantu aquella nun tien autoridá pa disolvela, pero argumentos pocu valieron escontra fuercia y nun consiguió con ello caltener la nuesa soberanía.
Alberto Rodríguez
This work is licensed under a Creative Commons Attribution 4.0 International License.
