Los convenios qu’actualizaron hasta abril les sos tables salariales pa esti añu recueyen una xubía media del 3,06%, con un IPC pa esi mesmu periodu del 4,1%
No que va d’añu nun se creó dengún conveniu y anováronse solo 24, algamando a un total de 46.000 trabayaores, la mayoría d’ellos pertenecientes al revesosu conveniu d’Hostelería y asemeyaos (30.657) y Comerciu en xeneral (12.000). Otros 69 convenios rexistraron l’actualización de salarios pal 2023, algamando a unos 132.689 trabayaores y que recueyen una xubía salarial media del 3,06%, la más alta en dieciséis años, como yera d’esperar énte la elevadísima inflacción. Entá asina, la medría salarial media apautá pa 2023 ta perbaxo la inflación actual (el 4,1% n’abril) .
Con esos datos na man, el responsable d’Acción Sindical de CCOO d’Asturies señala qu’en trés años la perda de poder alquisitivu de les persones trabayaores con conveniu axustáu n’Asturies va rondar los ocho puntos y la perda ye mayor entá pa quienes permanecen colos sos salarios ensin actualizar, p’aquellos que tán suxetos a un espediente de regulación d’emplegu temporal, p’aquellos que perdieron l’emplegu o pa quien tán afectaos por descuelgues de conveniu.
Alberto Rodríguez
This work is licensed under a Creative Commons Attribution 4.0 International License.
