N’Ast: “La utilización por Adrián Barbón de la Oficialidá ensin voluntá de sacala allantre namás valió pa engafentar a la drecha, y pa imposibilitar algamala en munchos años”

Que la mesma nuechi que’l PP queda a les puertes de ganar les elleiciones n’Asturies, la primer declaración del candidatu seya calificar como una victoria l’impedir la oficialidá de la nuesa llingua, ye l’amuesa perfecha de cuala ye la situación na que mos dexó la falcatrúa de la Oficialidá que mos vendió Adrián Barbón, llamentablemente cola collaboración por activa o pasiva d’otros partíos políticos teóricamente favoratibles a la oficialidá, d’asociaciones llingüístiques, y de la mesma Academia de la Llingua Asturiana.

Lo cierto ye que col estatutu que mos impunxeron dende Madrid –mesmamente cola istitución del ‘Principado’, tamién impuesta- non solo nun se mos reconoz la oficialidá de la nuesa llingua nacional, sinon que se ponen unes condiciones pa camudalu que precisen un sofitu de dos terceres partes de la Xunta Xeneral. Concidión difícilmente algamable si se parte de la oposición de los partíos de dreches, que ye poco probable que vaigan cuntar con una representación menor d’un terciu.

Arriendes d’ello la falta voluntá política, tanto del PSOE como del restu partíos estatales que dicen tar pola oficialidá queda nidia cuando comprobamos que dende’l trunfu d’Andecha Astur énte’l Tribunal Costitucional ¡hai 23 años! nun se consiguió dengún avance en reconocencia de drechos llingüísticos, nin a nivel nacional, nin de conceyos, primando una política de xestos ensin conteníu. De posturéu puru y duru, y en munchos casos de xeneración de redes clientelares.

Paez nidio que les polítiques de reivindicación llingüística amable, cordial, minimalista, simpaticona, posibilista (oficialidá amable), resignada (cambiar de rexistru porque nun m’entienden, asumir la galleguización del ocidente asturianu…), trunfalista (la postrer manifestación pola oficialidá) y politiqueada (el ‘votu útil’ pa la oficialidá) non solo nun mos llevaron a dengún llau, sinon que mos punxeron nun requexu del que malamente vamos poder salir, pol cansanciu xeneráu, pol marabayu socio-llingüísticu permitíu , y pol establecimientu d’un ghetu llingüísticu y unes redes clientelares serviles y entregaes.

Nesi sen, ye perimportante atayar argumentos autoinculpatorios como los que pretenden responsabilizamos de la situación na que mos afayamos porque “falamos poco n’asturianu”. Una cosa ye la coherencia llingüística que siempres hai que prauticala, y otro la situación d’anormalidá democrática na que mos sitúa la falta de reconocencia de drechos llinguísticos básicos que namás puen algamase al traviés de la oficialidá.

Ello asina, dende N’Ast queremos faer un llamamientu a replantegase’l llabor, recuperar la iniciativa, defender la xunidá llingüística asturiana, nun dexase llevar pol derrotismu, y  desixir les responsabilidaes polítiques pertinentes.

N’Ast

This work is licensed under a Creative Commons Attribution 4.0 International License.