“El funcionariu quier enchipase ya l’Ayuntamientu d’Illas siguii’l xuegu”, denunciaba esta mañana un vecín d’Illas en Twitter, refiriéndose a un nuevu casu de discriminación llingüística, mensaxe qu’acompangaba con semeya de la carta na que, contra la llegalidá vixente, se-y desixe comunicase col funcionariau y les alministraciones n’español 

Xuan Nel Gonzali, vecín d’Illas, vien de ser víctima d’un duple casu de discriminación llingüística per un llau per parte d’un funcionariu y pela otra per parte del Conceyu d’Iyas, que-y da la razón a esti.

Les irregularidaes entamaron ya anantes d’entrar na cuestión llingüística, cuando la Casa Conceyu otorga’l permisu al ciudadanu  pa facer una obra pa iguar puertes y ventanes, anantes de conocer la resolución del Serviciu Carreteres, tamién implicáu, cobrándose-y darréu les correspondientes tases.

Nun ye sinón depués de cobrar les tases, ello ye, cuando ya taba la obra a piques d’entamar, cuando Xuan Nel recibe un requerimientu por parte l’Ayuntamientu pidiendo-y un documentu téunicu del aparexador, puesto que la obra solicitao “modifica sostancialmente les midies de la fachada”. 

Pa cumplir con esti requisitu, l’afeutáu solicita la ficha téunica del aparexador y ye nesi intre cuando’l arquiteutu José Ignacio Fernández Arias refuga la documentación apurría por Xuan Nel Gonzali, allegando la non oficialidá del asturianu, citando la Costitución ya l’Estatutu, pero saltándo perriba la Llei d’Usu y Promoción del Asturianu. L’interfeutu manda entós un escritu a la Casa Conceyu reclamando que “el Ayuntamiento debera solicitar al interesado que presente su escrito en castellano a fin de que se pueda proceder a dar respuesta a su escrito”.

Recordemos que tamos falando d’un funcionariu, un arquiteutu dependendiente de la Conseyería de Mediu Rural y Cohesión Territorial, qu’aparentemente disprecia la Llei d’Usu, que debiere garantizar el drechu de tolos ciudadanos a emplegar l’asturianu nes comunicaciones orales o escrites col Principáu d’Asturies.

Lloñe de sacalu del so erru, l’alcalde Fernando Alberto Tirador Martínez, sigue-y la corriente y tresllada-y a Gonzali el recáu de que “Atendiendo a que el asturiano no es idioma cooficial de esta Autonomía, debe usted presentar su escrito en el idioma oficial a fin de que se pueda proceder a darle respuesta”.

Un casu más de los qu’a diariu se viven n’Asturies y que nun van parar d’asoceder entantu nun se cuente cola oficialidá del asturianu; Xuan Nel Gonzali nun piensa renunciar a los sos drechos ya insistirá fasta que se-y almita’l so escritu. Cuenta amás con pone-yos una denuncia na xusticia ordinaria, tantu al alcalde comu al arquiteutu implicáu.

Susana Sela

This work is licensed under a Creative Commons Attribution 4.0 International License.