Fotógrafos de tol mundiu vivieron y retrataron la sencia d’Asturies condensao nun alcuentru nel que Asemeyando escenificó delles cellebraciones asturianes pa ellos. L’eventu ye un descomanáu escaparate p’Asturies nel mundiu.

“Foi una esperiencia única y tenemos que volver repitir”. Asina se despidía la inmensa mayoría de los más de 125 fotógrafos que nel mes de xunu aconceyaron nel Photomeeting 2023 entamáu pola asociación llangreana “Asemeyando”.

Esti foi el primer añu qu’esti eventu, que cellebraba la so ochava edición, foi organizáu por una asociación yá que, hasta’l momentu, yeren los mesmos países o alministraciones  quien corríen con tol trabayu. Un fechu que tuvo bien presente FIAP a la d’otorga-yos, per segunda vegada, una placa d’oru que reconoz el so llabor. “Somos la única asociación que repite reconocencia” destacó Luis Vigil, presidente de Asemeyando.

Amás, tamién se-yos fixo valedores d’una nueva reconocencia: la placa d’oru de l’amistá fotográfica FIAP. Per otra parte, d’esti alcuentru surdió un hermanamiento con Tianjin, en China, que va xunir Asemeyando col país asiáticu. “Pidiéronnos oficialmente una collaboración pa la organización del Photomeeting de China”, señalaron dende la organización.
Desque empezaron a cuayar el proyectu y presentóse la correspondiente documentación pa la so aprobación per parte de la Federación Internacional d’Arte Fotográfico, “Asemeyando” siempres tuvo claro que la idega pasaba por aprofitar la ocasión y amosar Asturies en tol so esplandor, colos sos paisaxes, costumes y etnografía, coscientes de que  la realización d’esti alcuentru, con fotógrafos qu’espublicen en prestixoses revistes internacionales, supón una gran promoción p’Asturies.
“Los participantes pudieron esfrutar d’una Regalina solo pa ellos, d’un San Roque, de la Real Banda de Gaites Ciudá d’Uviéu tocando nel Naranco, d’una visita al Ecomuséu del Valle del Samuño con una escenificación con mineros, la Peña del Muséu del Pueblu Asturianu, de los Mazcaritos d’Uviéu y los Mazcaraos de Rozaes, los sidros de Valdesoto y los Zamarrones de L.lena o del grupu de baille y etnografía de Blimea que los acompañó en dos causes”, señaló Luis Vigil, presidente de Asemeyando.

L’asociación declárase satisfecha col desendolcu del alcuentru y presta-y siguir mensaxes d’agradecimientu, veníos de toles partes del mundu,  como’l del vicepresidente de la Federación Internacional del Arte Fotográficu, Joan Burguès Martisella, que señalaba que “l’alcuentru va quedar na memoria de tolos participantes y que lo recordaremos col pasu’l tiempu”.

Alberto Rodríguez

This work is licensed under a Creative Commons Attribution 4.0 International License.