Mariano Suárez
Comu rempuesta a la menacia de la conceyala facista de Festexos en Xixón, Sara Concepción Álvarez Rouco, de nun contratar artistes que s’espresen n’asturianu, Xune Elipe Raposo, el cantante de Dixebra, comentaba nes redes sociales: “Primero vinieron a polos músicos, pero comu yo nun yera músicu…”, adautándo’l célebre poema qu’agora sabemos que yera de Martin Niemöller, un cura lluteranu alemán.
La verdá ye que diome que camentar el comentariu de Xune, porque, con respetu, paecióme que nun s’acertaba nel exemplu. Desplícome darréu.
Lo primero ye afitar que les compañeres d’Andecha Astur vamos facer lo posible pa que los artistes asturfalantes (non sólo los músicos comu diz Xune) nun seyan víctimes del facismu cultural en Xixón. Y dicímoslo ñidio: facismu cultural. Porque ésa ye una de les consecuencies que van trayer les polítiques de Foro y Carmen Moriyón, tres roblar una entente facista con Vox y el PP.
Y nun lo dicimos de baldre. Comu s’informa na web d’Andecha Astur, esta organización acaba presentar una denuncia énte la Fiscalía Superior d’Asturies, acusando a la conceyala de Festexos, Sara Concepción Álvarez Rouco, d’un posible delitu d’odiu por discriminación por llingua, tipificáu nel artículu 510 del Códigu Penal, un delitu d’odiu coles agravantes d’alevosía, prevalencia de cargu públicu y reincidencia.
Too ello se desplica meyor equí…
Pero, vamos, que cuandu dicimos que plantaremos cara a les polítiques facistes ye porque lo vamos facer. Intentaremos per tolos medios que Xune y cualisquier otru artista asturfalante nun seya condergáu al ostracismu pol facismu español, por esi odiu visceral que tamién la estrema drecha tien a la llingua y a la identidá d’Asturies.
Llueu ta la otra custión, que pa mí nun ye importante, pero yá que salió… Trátase de quiénes son les primeres víctimes del odiu facista a lo asturiano.
Sobro esa tema quiero tresllada-y a Xune, comu collaciu y con ciñu (porque mos conocemos dende que les nueses fíes tiraben de chupu), que nun creyo que los músicosseyan les primeres víctimes, talo y comu él afita nel so comentariu nes redes sociales.
Primero foron los autores de los antiguos testos oficiales y lliterarios fechos n’asturianu cuandu se ñegaba qu’aquella escritura fore asturiana. La xente asturiano illustrao a la que namái se-y punxo torgues a les sos propuestes pa reconocer y dinificar la llingua y la cultura d’Asturies. Los antepasaos a los que-yos quitaron l’asturianu nes escueles a cibiellazos. Los mozos a los que se-yos arrampuñó la so llingua nos cuarteles militares a base de goña y castigos. Les güelines que nun foron bien atendíes na sanidá por nun saber falar más qu’asturianu. Les escolines de Villaviciosa a les que les monxes poníen multes por falar asturianu. Les ciudadanes a les que se-yos torgó rellacionase n’asturianu cola alministración. Les presones que nun pudieron defendese bien en procesos xudiciales por nun ser l’español la so llingua materna. Les escolines de los Centros-Pilotu de Llingua Asturiana qu’inventó’l PSOE pa determinar si deprender asturiano yera normal y científico o non. Les families que nun tienen tovía una asinatura vehicular d’asturianu pa les sos fíes. Les enseñantes d’asturianu con contratos inestables y ensin especialidá reconocío. Les ciudadanes a les que sólo se-yos espedíen documentos oficiales y d’identificación n’español. La infinidá de presones que dende 1976 salieron a les cais a vindicar la llingua’l país ensin que l’Estáu español-yos la reconociese comu a los demás pueblos. Les trabayaores rechazaes por facer los curriculos n’asturianu. Les periodistes que nun pudieron informar na so llingua. Les profesionales a les que nun se-yos reconoz comu méritu la so conocencia l’asturianu pa tratar cola ciudadanía o pa opositar. Les vecines de les ciudaes, villes y aldegues a les que se-yos prohibió’l so topónimu asturianu. Les ciudadanes que nun puen facer obres en casa si les piden n’asturianu. Les presones que durante tantísimu tiempu nun pudieron tener el so nome asturianu correchu. La infinidá d’asturianes que foron obligaes a renunciar a la so fala pa poder participar en procedimientos alministrativos, pidíu de beques, demanda d’aídes… Les académiques de la Llingua Asturiana que sofren unos estatutos de competencies ruines y unos presupuestos risibles. Les organizaciones sociales que nun pudieron rexistrar los sos estatutos n’asturianu. Les organizaciones polítiques que, comu Andecha Astur, tuvieron de llegar al Tribunal Costitucional pa que se reconociere’l drechu al votu n’asturianu. Y tantes, tantísimes xeneraciones de xente asturiano a les que dende siempres se-yos fizo sintir inferiores ya inorantesnamái que por ser asturfalantes…
Les primeres víctimes del odiu facista nun van cayer agora. Nin van ser los músicos…
L’odiu facista a la llingua y a la identidá d’Asturies ye una malura secular y tresversal nes organizaciones polítiques españoles. Nunes esprésase más nel formatu velenosu d’odiu irracional puru, n’otres esprésase más en forma represión sistemática, o comu ñegación amarutá de drechos llingüísticos, o en forma de proteutoráu llingüísticu colonial, o col estilu curil de vamos evanxelizate n’español pa sacate de la to inoracia, o nel cinismu falso-empáticu de “sí, toi contigo” cuandu se ta a la escontra…
Pero yá se ve que Vox, PP, Foro, PSOE, IU, Podemos/Sumar… cuandu tienen el poder o lu puen condicionar, enxamás s’alcuerden de reconocer la oficialidá al Pueblu Asturianu. Simplemente acomódense nuna de les trincheres descrites nesti párrafu y, dende ellí, dispárenmos con estremes fórmules antidemocrátiques y diferientes densidaes d’odiu identitariu. Eso ye lo que preba la hestoria d’Asturies.
Y pa facer frente a esta llarga rialidá de repesión nun se pue ser feble énte’l facismu; eso ta ñidio, anque agora paeza una novedá pa dalgunos.
Pero tampocu nun se puen sofitar organizaciones españoles de supuesta esquierda que mos tuvieron y tienen ensin drechos llingüísticos, nin se puen sofitar gobiernos o presupuestos de represores…
Porque la igua’l conflictu ta na llucha escontra’l sistema, non na collaboración con elli.
No que sí-y doi tola razón al collaciu Xune ye’n recurrir al espíritu del poema que cita (“primero vinieron a por…”). Porque na esencia d’esi testu hai un llamáu a la xunión solidaria pa retrucar al facismu y la represión. Neso coincido con Xune, coincido col poema, coincido colo que vien proponiendo Andecha Astur… La única solución que tien Asturies ye entamar un frente común d’organizaciones asturianes d’esquierdes. Toi convencíu, y poques coses me prestaríen más, de que Xune y yo terminaremos coincidiendo nesi camín.
This work is licensed under a Creative Commons Attribution 4.0 International License.
