Hostelería en Llucha créose pa frenar la firma del conveniu en precariu d’hostelería. L’ésitu n’esi oxetivu, comu mos cuenta Rubén Ortea, foi escasu: namás consiguieron que nun yos quitaren la nocturnidá. La situación agora nun ye la meyor posible, pero nun van dase tan fácilmente.
¿En qué situación ta agora Hostelería en Llucha?
Arriendes de nun consiguir los oxetivos, los compañeros foron abandonando y anguañu quedamos namás yo y cuatro mas, tamos en mal momentu, porque ye la dómina fuerte de trabayu n’hostelería.
Entá asina, nun vamos rindir tan fácilmente. En delles conversaciones con compañeros decidimos crear la plataforma hostelería calidá. Vamos negociar y vamos bregar nos centros de trabayu pa que, a lo menos, respeten el conveniu que tenemos na actualidá.
¿Cuálos son los principales problemes a los que vos enfrentais anguañu los trabayaores d’hostelería?
Problemes? allárguennos les hores, nun respeten les hores de comida y descansu ente xornaes, nun paguen los desplazamientos, nun hai profesionales, nun hai categoríes profesionales, personal ensin papeles, cotices dos hores y trabayes 10, nun hai organización, falta material y paguen, como muncho, afechu al conveniu (naide paga de más).
Pero’l problema principal ye la temporalidá, contratos de fin de selmana, la repartida d’horarios… esto provoca amás de precariedá muncho estrés nel trabayu, males contestaciones, presión n’hores punta por falta de trabayadores… les baxes, bien abondoses, nun se cubren.
Ente los compañeros nun hai xunión y nun ven la realidá, ficiéronse a les males condiciones y asúmenles.
Y los pocos que reconocen que la situación ta mal, nun quieren collaborar por mieu a destacar sobre otros compañeros, carecer represalies o despidos. Hai medrana y falta d’enfotu a enfrentase al empresariu.
¿Hai esceiciones honroses pente los empresarios hosteleros?
Esceiciones nos grandes centros o club con cobertoria económica de sociedá, solo equí trabayen profesionales, hai categoríes y too ta organizáo; Club de tenis, club de regatas. etc.
Esceiciones honroses, bien poques, el que les lleva a cabu ye por que tien un clú social detrás y hosteleros oxetivos y bonos empresarios, que xestionen correchamente los sos establecimientos, pero nun pueden competir por culpa d’un montón d’hosteleros que xestionen fora de la llei y seguridá, defraudando y pagando mal.
¿Qué hai de ciertu na teórica falta de trabayaores na hostelería?
Nun hai camareros? Tán fuxendo del oficiu. Hai munchos pero tán d’almaceneres, comerciales, celadores, n’Europa nes Isles Canaries, Baleares.
Cómo veceros, ¿Cómo podemos collaborar?
El consumior lo únicu que pueden facer ye tener muncha paciencia colos trabayadores y facer les reclamaciones al empresariu, nunca culpando al trabayador. El trabayador si nun lo fai bien ye porque l’empresariu nun lu enseño correchamente. O nun escoyó un profesional nel momentu de la contratación.
Alberto Rodríguez
This work is licensed under a Creative Commons Attribution 4.0 International License.
