Mentantu en Xixón menacien cola discriminación llingüística más xabaz y n’Asturies entera se dan reblagos p’atrás na normalización, Bimenes, comu’l míticu pueblu galu, resiste y sigui permitiendo vivir y falar oficialmente n’asturianu. Ven a cellebralo con ellos esti fin de selmana
Los actos d’esti día na XXVII Fiesta de la Oficialidá en Bimenes entamaren ya cola selmana cultural previa, del 26 al 30 de xunu, con actividaes toles tardis na Casa Cultura de Santuyano. Los actos folixeros arranquen güei a les 21:30 cola Nueche en Danza, col grupu folclóricu Los Yerbatos y La Bandina d’Oscarín nel práu la Casa Marqués d’Estrada.
L’actu istitucional, que da xentíu a esta cellebración, tendrá llugar mañana sábadu a les doce’l mediudíi, cola participación d’Aitor García, alcalde de Bimenes, y Helena Barril, alcaldesa de Miranda de l Douro, llugar onde’l Mirandés, una llingua perasmeyá al asturianu, ye oficial, y col que Bimenes ta xermanao. El pregón tará esti añu a cargu de la escritora Blanca Inés Fernández Quintana. Darréu, los asistentes tan convidaos a ballar la danza de la Oficialidá, anantes del pasucais que fadrán L’Ensame de Música Tradicional los Yerbatos y los Pauliteros de Miranda de l Douro, que tamién va actuar colos sos balles nel prau del Palaciu del Marqués de Casa Estrada, onde va celebrase la xira popular.
Darréu la xinta, a les 17 hores, van entamar los esportes del país, colos talleres entamaos polos Arqueros de Teberga y l’amuesa de Baltu. La cena nel prau ta prevista pa les 21:30 hores, pa siguir colos conciertu d’Algaire y La Tarrancha.
Alberto Rodríguez
This work is licensed under a Creative Commons Attribution 4.0 International License.
