El precongresu de la Federación Socialista Asturiana apreba’l conceutu d’una España “plurinacional” mirando pa Catalunya y escaeciendo a Asturies.

El trunfu de les tesis sanchistes fexo que s’aprebare nesti precongresu una conceición plurinacional del Estáu, pero como rempuesta a los compromisos algamaos por Pedro Sánchez col PSC, y escaeciendo nel alderique y na resolución final a Asturies, quedando ensin definir que papel se-y atribúi al nuesu país nesa recién descubierta pol PSOE “España plurinacional”.

Too paez indicar qu’una vuelta más torna a repetise’l mesmu procesu de la transición, onde’l PSOE defendió’l conceutu de “naciones hestóriques” esceciendo a Asturies, y entamó un procesu estatutariu nel que condergó al nuesu país a una Istitución y a un Estatutu autonómicu impuestu dende Madrid qu’a diferencia d’andaluces, catalanes, vascos, gallegos… a los asturianos enxamás nun se mos permitió votar.

Nesi sen, dende Andecha Astur denunciase que “l’aprebación pela FSA d’esi conceutu d’España plurinacional escaeciendo a Asturies va suponer pal nuesu país otru pasu atrás na reconocencia de los nuesos llexítimos drechos hestóricos, y un nueu avance nel procesu asimilacionista nel que ta enfotáu’l PSOE n’Asturies. La propuesta aprebada pela FSA supón una España de tres naciones: Catalunya, Euskadi y la propia España, y ye nidio onde ponen a Asturies”.

This work is licensed under a Creative Commons Attribution 4.0 International License.