Bonos díes, bona xente.

Alborecemos col cielu cubierto ya con unes temperatures que tan alrodiu de los 18ºC, rexistrándose nel puirtu Payares 10,1ºC.

Güei vamos tener el cielu nuboso con nubes de tipu mediu-alto per un lláu y nubosidá estratificada per otru, amás les nubes pela tarde puen tener ciertu desendolque y dexanos dalgún xarabatu de calter tormentosu mui llocal pela cordelera con unes temperatures másimes en descensu.

Mañana xueves veremos dalgo más el sol por mor de la disminución de la nubosidá estratificada con tovía dalguna nubes media-alta ya cola apertura de dellos claros o abancios. De tarde puen surdir nubes de desendolque que malpenes dexarán dalguna gotera o xarabatín de calter tormentosu pela cordelera con unes temperatures másimes n’ascensu.

El vienres vamos tener más ratos de sol y l’ascensu les temperatures sedrá bultable, sicasí pue surdir dalgo de nubosidá de desendolque pela cordelera y dexar perellí dalgún xarabatu mui llocal.

El sábadu aumentará la nubosidá de tarde y el domingu volverán les nubes baxes y los estratos a la metá norte d’Asturies.

Que paséis un bon miércoles collacies ya collacios.

Semeya de Mary Pandiella dende Les Arriondes.