Concentración mañana a les 19:30 a les puertes de la Semana Negra, dientro la campaña d’Asturies Insumisa “Turismu masivu, malu pal turista, malu pal nativu”

“Una actividá turística bien orientada tien de repercutir positivamente nel conxuntu la sociedá asturiana, escomenzando polos y poles trabayadores del seutor, y nun puede traducise esclusivamente en beneficiu empresarial”

Asturies Insumisa escueye la Semana Negra comu un de los munchos escenarios onde se da la esplotación llaboral lligada al branu ya’l turismu, con salarios precarios, horarios d’allorie, impagos, pagos en prietu, xornaes illegales y demás, ante la impasibilidá y munchos casos el desconocimientu de los miles de visitantes que percuerren l’eventu.

Pa los convocantes, el gran xorrecimientu’l turismu n’Asturies -ya’l consiguiente espoxigue de los ingresos de los empresarios- tien de tener comu consecuencia una meyora de les condiciones llaborales y salariales de los y les trabayadores que dependen d’esta actividá, non solo hostelería y hotelería, sinón tolos demás lligaos a esta actividá, llimpieza, fiestes, feries, conciertos, tresportes, comerciu, macroconciertos, etc.

La realidá, sicasí, ye la contraria: les condiciones son ca vuelta más precaries, xornaes de trabayu illegales, con horarios variables que torguen al trabayaor organizase, salarios de risión, que munches vegaes nun coticen bien na Seguridá Social, ensin los descansos reglamentarios, ensin pagu d’hores estres…

“Un modelu de turismu masivu y orientáu solamente a que l’empresariáu faiga caxa, ye un mal modelu” apunten dende Asturies Insumisa, pidiendo la puesta en marcha d’un modelu de turismu más racional, tamién no llaboral. “El gran xorrecimientu’l turismu n’Asturies deberíe tener, como primera consecuencia, una meyora de les condiciones llaborales y salariales”, aporfien.

La cita ye mañana martes once de xunetu, na puerta principal de la Semana Negra.

Alberto Rodríguez

This work is licensed under a Creative Commons Attribution 4.0 International License.