Llucía F. Marqués

Nel so caberu artículu de Teresa Sánchez Rodríguez, nel que se define a si mesma comu “Salmantina de nacimiento, asturiana de corazón”, non solo afonda na so refuga a reconocer a los asturianos los sos drechos llingüísticos, sinón que tamién ataca a quienes defenden un futuru más dignu pal pueblu asturianu

Quiero informala d’un detalle, Sra. Sanchez, los drechos nun s’imponen, reconócense. Dígolo porque nun ye la primer vegada que se declara ofendidísima porque los asturianos quieran “imponer la oficialidá” a los “asturianos de corazón”, que vien a ser un títulu que se autoimpón esta señora por esfrutar de la hospitalidá de los xixoneses, acudir comu bona cristiana a la Bendición de les Agües del Cantábricu y canciar “Gijón del Alma” cola man en pechu.

Col mesmu desparpaxu que se regala’l títulu d’asturianía y ñega drechos a los asturianos, Teresina critica a quienes defenden un bon nivel de vida pa la xente que vive n’Asturies (seya de cuna o por escoyeta), comu ye’l casu de les persones que, convocaes por Asturies Insumisa, reclamaron delantre la Selmana Negra un turismu de calidá que permita asegurar los drechos llaborales básicos a les persones que trabayen nel sector.

Pa entamar, recomendamos-y que meyore la so capacidá de llectura comprensiva, daqué perimportante tratando de ser periodista, porque na nomada concentración y los miles de folletos que se repartieron na mesma -en billingüe, pa que fasta los visitantes foriatos y los asturianos, pero non muncho, de corazón pudieren entendelo- nun se pidió la desapaición del turismu, sinón, bien distinto, el cambiu de modelu turísticu hacia ún más caltenible dende delles perspeutives. Pa siguir, tien la so gracia acusar de “ocultar la so identidá” a persones que tuvieron ehí, tres de la pancarta y repartiendo folletos, en persona; la cara dase asina, non al traviés de llinies airaes en periódiquinos o en perfiles en redes sociales (por ciertu, convídola a visitar el miu, non, nun oculto la identidá).

Y pa finar, si, ehí voi dar la razón  a Teresa, si que queremos ser una República Independiente. Una na que’l pueblu asturianu seya dueñu del so presente ya’l so futuru y nun puea venir cualisquiera a decinos comu tenemos que vivir, comu queremos trabayar y que drechos quier o non permitinos, por muncho que lleve 22 años aplaudiendo goles al Sporting.

Nun quisiera finar ensin agradece-y a Teresa Sánchez el so arranque de sinceridá nel sotítulu y na llinia 45 del so caberu artículu “parece que los no nacidos aquí no podemos hablar de lo que no sabemos”. Polo menos reconoz que nun sabe de lo que fala.