Iniciativa pol Asturianu participó na cuarta convención de mocedá falante de llingües minorizaes

La llingua asturiana tuvo presente esta selmana na cuarta edición de los alcuentros de xóvenes falantes de llingües minorizaes (HIGA) que se cellebraron fasta’l 21 de xunetu en Vitoria-Gasteiz. La vocal de Mocedá y Voluntariáu d’Iniciativa pol Asturianu, Alma Hidalgo,  participó nesta convención, que tien como principales oxetivos la revitalización de les llingües minorizaes y el trabayu en rede ente les diferentes comunidaes internacionales de falantes. D’esta manera, les persones pertenecientes a diferentes comunidaes de falantes comparten tantu procesos de revitalización como nel campu del activismu llingüísticu, asina como la so realidá, conociendo la de los demás participantes.

Nel simposiu, Hidalgo espuso la situación actual del idioma y el bon momentu actual pa la so recuperación y normalización. D’igual manera, remembróse lo positivo que resulta pal idioma cuntar con una presencia importante nes redes sociales y cómo la llingua asturiana ta revitalizándose nes nueves xeneraciones.

Nel alcuentru, nel participaron activistes llingüístiques de tol mundu, Hidalgo insistió na importancia de la declaración d’oficialidá nel Estatutu d’Autonomía y señaló que l’asturianu ye una de les poques llingües que participen nel congresu qu’entá nun tien un estatus d’igualdá nel sistema xurídicu, dalgo que xenera torgues pa los sos falantes y complica la tresmisión xeneracional. Mientres la so estancia en Vitoria-Gasteiz, la representante asturiana tamién repasó la complicada situación del idioma na escuela, lo que tamién afeuta direutamente al so conocimientu.

La directiva de l’asociación aprofitó pa repasar la trayectoria d’Iniciativa pol Asturianu dende la so fundación en 2011, atrayendo nuevos perfiles y sensibilidaes al trabayu colectivu pol idioma, llogrando sumar voluntaes y trabayar en positivo pola so normalización abriendo nuevos espacios pa la dignificación de la llingua asturiana.

Susana Sela

This work is licensed under a Creative Commons Attribution 4.0 International License.