Dellos trabayaores de Xata Roxa lleven dos meses ensin cobrar y un ensin tener ocupación. Concentraránse esti martes frente la Casa Conceyu Noreña y el 31 de xunetu fadrán una güelga de dos hores
La marca Xata Roxa, sociedá mercantil de l’Asociación de Criadores de Ganao Vacuno Seleuto de la Raza Asturiana de los Valles (Aseava), costituyóse nel 2001 col envís de promocionar y controlar la venta de carne d’animales iscritos nel Llibru Xenealóxicu de la raza Asturiana de los Valles, tando costituyía anguañu por 476 socios y siendo una garantía d’orixe, control y trazabilidá de la carne asturiana, con venta esclusiva en carniceríes asociaes. El so llabor ye perimportante na comercialización de carne de xata y poro na economía de cientos de ganaeros.
Sicasí, la situación de Xata Roxa lleva tiempu siendo llaceriosa, con deldes de miles d’euros a ganaeros, ventes de xatos ensin pagar a los criadores, llocales abandonaos con renta impagao, demandes de trabayaores por impagu de nómines… en concretu, 26 trabayaores de les sos istalaciones en Noreña de, , lleven dos meses ensin cobrar ya ensin tener dala información del motivu d’esti impagu.
El fechu ye que, pesi seguir contrataos, nin siquier tienen trabayu nos caberos trenta díes. Esti martes concentraránse ante la Casa Conceyu de Noreña ya’l 31 de xunetu de 13:00 a 15:00 hores abandonarán el so puestu de trabayu pa concentrase ante les istalaciones d’ASEAVA en Llanera, desixendo, como mínimo, desplicaciones. La empresa ya alvirtió de la posibilidá d’aniciar un Espediente de Regulación d’Emplegu, cola intención de despedir a la totalidá de la plantilla.
Susana Sela
This work is licensed under a Creative Commons Attribution 4.0 International License.
