La campaña contra l’actual modelu de turismu qu’Andecha Astur vien desendolcando tolos branos hai años y qu’esti añu tamién ta movilizando Asturies Insumisa, con intervenciones en llugares y eventos destacaos del branu asturianu, garra puxu esti mes de xunetu
El repartu de folletos por un turismu caltenible de la campaña “Turismu masivu, malu pal turista, malu pal nativu” qu’entamó esti añu Asturies Insumisa treslladaráse esta selmana al Tsunami xixonés, onde cuenten espardir información los tres díes que dura l’eventu, tresmitiendo a los asistentes el so esmolecimientu, non solo poles consecuencies del turismu masificáu sobro la cultura, paisaxe ya identidá asturianos, sinón el más cuantificable impautu del mesmu sobre les condiciones llaborales ya’l preciu de la vivienda y la calidá de los servicios. Estos folletos repartiéronse ya na Semana Negra, nel Reggaeton Beach Festival, el Festival Intercélticu de Llanera y nel Boombastic.
Pel so lláu, Andecha Astur, que tamién participa nes aiciones d’Asturies Insumisa, convoca pa la mañana d’esti xueves 28 un duple repartu d’información en Xixón, concretamente en La Escalerona y Les Lletrones. Los turistes recibirán un panfletu nel que, en tonu amable, se-yos agradez la so presencia n’Asturies y se reconoz les bondaes del turismu, siempres que nun suponga “esfarrapar el nuesu texíu socio-económicu,
desplazar a la población asturiana, dañar el nuesu mediu ambiente, destruyir y despreciar la nuesa llingua y cultura, precarizar el trabayu, encarecer la vivienda…”.
Esta triba d’actuaciones continuarán a lo llargo tol branu col envís crear concenxa, tanto pente los turistes comu pente los mesmos asturianos, de la necesidá de xenerar p’Asturies otru modelu de turismu.
Susana Sela
This work is licensed under a Creative Commons Attribution 4.0 International License.
