“El modelu turísticu que’l PSOE tien p’Asturies ye sólo la monetización rápida de los enclaves turísticos, facilitando grandes ingresos a dalgunes patronales (tresporte viaxeros, hotelería, hostelería…), y ensin reparar nos daños que’l turismu masificáu causa nel mediu ñatural y nes formes de vida de la población residente”

La carretera Cuadonga-Los Llagos, CO-4, forma parte de la rede carreteres d’Asturies; con un anchor de 5’35 metros, un desnivel superior a los 1.000 m. y una dura ascensión de 14 km apinaos de grandes curves, faen falta nel meyor de los casos trenta menutos pa percorrela. Si se crucen dos autocares, el marxe llibre ye de 17’5 cm a ca llau, y eso porque busquen, comunicándose per radio, los puntos estratéxicos pa cruciase, sinón, cenciellamente, nun caben; falamos  d’autocares d’alrodiu les 18 tonelaes de pesu, fasta 35 al díi, pasando per una carreterina d’alta montaña cuya principal función tendría de ser dar serviciu a los ganaeros de la zona. 

Sicasí, la política del PSOE p’Asturies lleva décades apostando pol turismu masificáu, sofitando empreses privaes que, comu ALSA, saquen bon profitu económicu de la esplotación d’Asturies. El Plan d’Acesu al Parque Cuadonga lleva vixente dende 2005, cuandu por primer vegá se punxeron d’alcuerdu ALSA, arzobispáu y Gobiernu d’Asturies, formalizando un monopoliu de tresporte de viaxeros a los Llagos que fonciona la mayor parte l’añu y rentabiliza n’esclusiva la multinacional de los Cosmen, una de les dinastíes más riques del Estáu, a un preciu de 9 € el viaxe y millones d’usuarios.  P’Andecha Astur esa ye l’auténtica razón del reciente acidente d’un ALSA subiendo a los Llagos “Tamos ciertosde la profesionalidá del conductor del ALSA acidentáu, de la d’él y de la de sos compañeros” declaren. “Nun vamos entrar en si l’acidente lu prevocó l’estáu la carretera, magar que ca poco hai tresnar fundimientos del firme, muries d’escollera y el drenax. Nun vamos detenemos en si se cruciaron o non dos autocares. Porque la clave del acidente nun ta neses custiones, sinón nel modelu col que PSOE y ALSA esploten turísticamente’l Parque Cuadonga“.

Pa la formación nacionaliega, que lleva años desendolcando campañes contra esti modelu de turismu, la masificación nun ye una solución p’Asturies, sinón mui al contrariu, parte del problema, non solo nel Parque Cuadonga, sinón en munches otres partes d’Asturies, “especialmente na costa oriental, onde’l turismu ta echando a la población mozo de les so villes, encareciendo tremendamente la vivienda, estropiando los niveles de calidá de vida, saturando los sirvicios públicos básicos, xenerando sólo puestos de trabayu temporales y dafechamente precarios”

Ante’l desastre, Barbón y el PSOE nun convocaron una reunión urxente del Consorciu Tresportes. Nun suspendieron el tiempu suficiente’l sirviciu d’ALSA a Los Llagos. Nun espublizaron nengún informe téunicu sol estáu la carretera CO-4. Nun falaron de llimitar l’acesu a los aparcamientos del Parque nin el númberu visitantes diarios a Los Llagos nin de sostituyir los autocares mostru d’ALSA por vehículos de menor pesu y dimensión. Nun corten de raíz los ruxíos interesaos que promueven un tren cremallera a Los Llagos. Nun tienen nengún plan p’atayar los efeutos que la contaminación atmosférica ta teniendo yá na contorna Los Llagos. Nun gueten denguna política estratéxica pa diversificar los ingresos na fastera. Nun dan acabu a l’apaición de basoria’n Los Llagos. Nun faciliten la participación social na regulación turística nin na ordenación d’aquel territoriu. A cencielles, el presidente d’Asturies, comu bon xestor d’un país modernu y teóricamente llaicu del sieglu XXI, llimítase a dar les gracies a la Santina porque nun hebio muertes -esta vegada-.

Redaición InfoAsturies

This work is licensed under a Creative Commons Attribution 4.0 International License.