L’uvieín Jaime Álvarez Fernández torna ganar el troféu bretón nuna xornada con gran protagonismu de los asturianos nel Festival Intercélticu de Lorient
Cincu años lleva Jaime Álvarez concursando nel Mac Crimmon y esta ye la so segunda victoria como meyor solista de gaita del mundu célticu. Nel 2017, con namás dieciseyes años, ganaba por primer vuelta y esti añu, con ventidos, presentábase convencíu de les sos posibilidaes. Una actuación impecable, utilizando namás que la so propia gaita asturiana pa interpretar les pieces gallega, bretona y asturiana que desixe’l concursu, dexólu comu favoritu del públicu dende la so actuación, nel segundu llugar.
Sicasí, el nivel yera estremadamente altu, tanto por parte de los asturianos comu de los gallegos, ya incluso d’un madrilanu con raigañu gallegu que se fizo col segundu premiu. Rafael Carracedo cuenta con una amplia formación musical que va más pallá de la gaita, siendo ganador d’abondos concursos internacionales comu solista de trompeta; ayeri amosábase emocionáu col so segundu premiu y afirmaba que nun se presentaría otru añu, “munchos nervios”. El tercer premiu foi pa Diego Lobo, otru veteranu gaiteru asturianu con una importante trayeutoria musical a recostines.
Nesa mesma xornada, el gaiteru Daniel Meré acompangáu del gaiteru gallegu Ismael García daba una Master Class sobre gaita na que se desplicaron les desemeyances pente la gaita asturiana y la gallega, asina comu dellos aspeutos téunicos de la gaita, comu les estremaes afinaciones o la influencia del tipu de maera nel soníu. Daniel aprofitó la ocasión pa reclamar una mayor implicación del Conservatoriu Superior de Música pa cola tradición musical asturiana, afeándoyos la falta d’investigación musical y l’usu de repertoriu basicamente gallegu contemporaneu nel gráu de gaita asturiana.
Tamién el grupu de baille Fitoria recoyó abondosos aplausos cola so actuación na amuesa de bailles célticos, nuna actuación impecable al par que gayaspera na que fueron l’únicu de los países participantes nos que la xente del públicu salió a baillar. Nos bises, demandaos pol públicu, sacaron a ballar incluso al presentador, un bretón entráu n’años qu’esfrutó visiblemente de la Danza Santana.
Los gaiteros de la Banda Gaites Castrillón desfilaron peles cais de Lorient na mesma tardi d’esti sábadu, per cais apinaes de xente de tolos países qu’acoyeron con aplausos la so actuación.
Pa finar, la nueche aconceyó a toles bandes y grupos de baille de los diez países participantes nel espeutáculu Horizons Celtiques, una impresionante actuación conxunta curiaosamente orquestada con música y balles de toles naciones celtes.
Llucía F. Marqués
This work is licensed under a Creative Commons Attribution 4.0 International License.
