La formación nacionaliega propón una Mesa de Cordinación de Necesidaes Profesionales, que garantice formación pública y condiciones llaborales y salariales dignes

Señala a los Gobiernos del PSOE comu responsables direutos de la falta trabayaores cualificaos en seutores fundamentales

El Gobiernu d’Asturies nun cumple dende hai décadesla so fonción de planificar y cordinar la formación, les necesidaes llaborales y el desenrollu socioeconómicu. D’esta manera atopámosmos con que n’Asturies entamen a faltamos profesionales de cualificación media y alta’n seutores fundamentales.

Nel país tenemos falta méliques, enfermeres, matrones, panaeres, confiteres, albañiles, encofraores, gruistes, pescaores, especialistes en desenrollu software, ciberseguridá, cloud computing, telecomunicaciones,  Big Data, intelixencia artificial, enerxíes renovables, hostelería, reparaciones metáliques… Profesionales d’éstes y otres especialidaes faen falta n’Asturies.

Esti grave problema nun se presentó de sópitu, hai evidencies d’ello dende cuantayá. Sicasí, los sucesivos gobiernos del PSOE n’Asturies nin ficieron los estudios de previsión necesarios, nin aperiaron les polítiques formatives que facíen falta, nin entamaron midíes estratéxiques en materia demográfica, nin afalaron l’alderique públicu y los procesos de participación social que desixe la seriedá del tema.

Énte esta situación, Andecha Astur vien de proponer al Gobiernu PSOE-IU l’entamu n’Asturies d’una Mesa de Cordinación de Necesidaes Profesionales; ella tendría por misión ellaborar y llevar al Conseyu Gobiernu propuestes nos ámbetos formativu, demográficu, llaboral y socioeconómicu, p’atayar el problema señaláu.

La Mesa de Cordinación de Necesidaes Profesionales, al ser un marcu de trabayu interseutorial, podría depender orgánicamente de la Conseyería Presidencia. Y deberíen formar parte d’ella representantes de les Conseyeríes implicaes, asina comu representantes de la Universidá, especialistes en Formación Profesional, en recuperanza demográfica, en materia llaboral y socioeconomía.

El Gobiernu debería facilitar el llabor d’esta Mesa convirtiendo’n normes aquelles propuestes qu’aseguren pa los nueos profesionales tanto una formación pública de calidá, comu unes condiciones llaborales y salariales dignes. Porque ye bien sabío qu’énte les causes de qu’Asturies careza güei de profesionales atopamos el llargu abandonu y privatización xabaz de la Formación Profesional, l’abandonu y reconversión intencioná de los Centros Propios de Formación pal Emplegu, el consentimientu del deterioru de les condiciones llaborales, la permisividá nel incumplimientu de convenios y midíes de seguranza llaboral, la falta d’una Ispeición Llaboral suficiente y eficaz, la complicidá con polítiques salariales que conducen necesariamente a la precariedá de la clas trabayaora, etc. De mou que foron los propios Gobiernos del PSOE n’Asturies los culpables de que bona parte la mocedá asturiano se viere obligao a emigrar, a la gueta de futuru presonal y profesional y de retribuciones dignes.

Andecha Astur señala l’altu riesgu que tendría pa la ciudadanía’l nuesu país el fechu de que’l nueu Gobiernu PSOE-IU nun tomare denguna iniciativa urxente nesta materia, dexando al debalu, comu fizo fasta agora, la ordenación de les necesidaes profesionales n’Asturies.

This work is licensed under a Creative Commons Attribution 4.0 International License.