Responsabiliza de la matanza toros al PSOE-IU por nun dexar una normativa antitaurina y al Gobiernu municipal facista d’anguañu por mazcaritar de “cultura” la tortura animal

“Llegó al Gobiernu municipal de Xixón la entente facista de Foro-PP-Vox y trayen de la man más matances de toros, esa amuesa de tortura animal que’l franquismu impunxo comu supuesta preba d’una “cultura” compartía’n tol Estáu” declaren dende Andecha Astur, señalaando qu’estes nuees matances de toros en Xixón tienen responsables múltiples.

Pa ellos, son responsables d’elles el PSOE, IU y Podemos, ya que’l gobiernu español PSOE-Podemos-IU nun quinxo derogar la Llei 18/2013, de 12 de payares, “pa la regulación de la Tauromaquia comu padremuñu cultural” (BOE 13/11/2013), una vergoña de llei, aprebá pol PP, y qu’afita que la matanza toros ye “parte esencial del Padremuñu Hestóricu, Artísticu, Cultural y Etnográficu d’España”. El gobiernu “más progresista” de los Borbones ehí mos dexó esti regalu envelanáu.

A nivel municipal, l’anterior gobiernu PSOE-IU tamién pudo aprebar unes Ordenances Municipales sobro maltratu animal y sobro usos de la Plaza Toros, que supunxeren dalguna dificultá pa la execución de nuees matances taurines. Nun lo fizo.

Señalen tamién comu responsable ala entente facista que gobierna la ciudá. Foro, PP y Vox retomen les matances de toros cola insana intención de facer creyer que n’Asturies “presten” y que formen parte de la “cultura” popular.

 Y ye que n’Asturies tanto los partíos españoles de dreches comu los d’esquierdes tuvieron y tán d’alcuerdu’n caltener una superestructura “cultural” cola que faen por asimilar Asturies a un modelu xeneral supuestamente “cultural” y español. Ehí tán les matances de toros, les Feries d’Abril, les eshibiciones d’aviación militar, les procesiones, la Fundación Princesa, etc. Mentantu, toos ellos son responsables de la falta d’oficialidá del asturianu, del deterioru’l nuesu padremuñu hestóricu y cultural, de la perda de les tradiciones asturianes…

    Pa dexar clares estes responsabilidaes, pa denunciar el regresu les matances de toros y pa desixir respetu pol auténticu modelu cultural asturianu, Andecha Astur va participar nel manifestamientu qu’esti 15 d’agostu convoquen, en Xixón, les asociaciones antitaurines.

Redaición InfoAsturies

This work is licensed under a Creative Commons Attribution 4.0 International License.