@eltiempunasturies
Bonos díes, bona xente.
Alborecemos con dalgo de nubosidá estratificada ya con unes temperatures que tan alrodiu de los 18ºC, rexistrándose nel puirtu Payares 10,7ºC.
Güei van dir abriéndose grandes claros a lu llargu la mañana, tando escampláu pa la cordelera y surocidente asturianu, yá pela tarde aumentará los estratos y nubes baxes cubriendo casi percompletu toa Asturies a últimes hores. Les temperatures subirán un poquiñín más y l’ambiente sedrá chornosu, sicasí pela costa les brises marines refrescarán dalgo l’ambiente, tando más afayaizu.
Mañana martes ya nun veremos el sol na mayor parte d’Asturies y l’orpín fadrá actu de presencia dende primera hora, sobre too nel entornu de los cordales del prellitoral, parando a partir del mediudía y volviendo al atapecer con unes temperatures másimes en descensu, mentantu les mínimes sedrán mui suaves por mor del cielu cubiertu.
El miércoles tendremos una situación mui asemeyada, con borrinos y nublines que vendrán acompangaos d’orpín dispersos ya intermitentes, más probables hacia’l llitoral y fastera central asturiana con unes temperatures que camudarán poco.
A partir del xueves meyora ya tendremos una subida importante de les temperatures con másimes qu’algamarán los 30ºC en puntos del interior, situación que pue estendese a lo que queda de selmana pero esto yá lu diremos viendo.
LA MAR:
La temperatura del agua del mar sigue tando mui suave, alrodiu de los 22ºC y la mar va tar seliquina, siendo la pleamar a les 16:30h aprosimadamente.
Que paséis un bon llunes collacies ya collacios.
Semeya del cumal Gilbo que mos apurre’l nuesu collaciu Luis Alfredo.
This work is licensed under a Creative Commons Attribution 4.0 International License.
