Más d’una docena d’actividaes repartíes per tol recintu ferial van centrar el programa, entamáu por Iniciativa pol Asturianu y la Cámara de Comerciu de Xixón, nel que la llingua asturiana va ser la protagonista
La Feria Internacional de Muestres d’Asturies (Fidma) cellebra esti sábadu 19 d’agostu’l II Día de la Llingua Asturiana con un programa d’actividaes qu’inclúi más d’una docena d’actividaes. Iniciativa pol Asturianu, en collaboración cola Cámara de Comerciu de Xixón, entama esta xornada dedicada a la llingua asturiana dientro l’eventu.
El programa d’actos va entamar a meudía cola recepción del presidente d’Iniciativa pol Asturianu, Iván Llera, a representantes del Gobiernu asturianu, instituciones, alcaldes y conceyales de tola comunidá, a los que quier facer aportar el so mensaxe de defensa de la llingua asturiana. Darréu, va tener llugar el pregón popular a cargu de Xosé Manuel Fernández y el pregón reivindicativu a cargu de l’actriz Nerea Vázquez. L’actu va continuar con un homenaxe a la figura de Gaspar Melchor de Xovellanos, que cuenta con un bustu nel recinto ferial Luis Adaro.
De siguío, a les 13:00 hores, la comitiva va treslladase al puestu d’Iniciativa pol Asturianu, asitiáu nel pabellón 3-4 del Palaciu de Congresos, onde van presentase les catorce empreses que participen nel espaciu de la entidá. Media hora depués, a les 13:30 hores, va tener llugar una tastia de Cerveza Cotoya nel mesmu espaciu.
Pa entamar la tarde, a les 16:30 hores, va tener llugar la presentación de la revista lliteraria ‘Formientu’ nel puestu de ‘La Nueva España’. De siguío, a les 17:00 hores, va haber una visita guiada n’asturianu al Muséu del Pueblu d’Asturies. Más tarde, a les 17:30 hores nel puestu d’Iniciativa pol Asturianu va tener llugar la presentación del llibru ‘La Vieya’, escritu por Aique Fernández y editáu por Radagast. Nel mesmu espaciu, pero a les 18:00 hores, los visitantes van poder participar nuna degustación de productos de Panduru, una de les dos empreses qu’esti añu debuten nel puestu d’Iniciativa pol Asturianu na Feria de Muestres.
La reciella tamién va tar presente nel II Día de la Llingua Asturiana nel recintu ferial Luis Adaro. L’animador Sergio Buelga va protagonizar un cuentacuentos n’asturianu a partir de les 18:00 hores nel espaciu del Conceyu de Llanera. A la mesma hora, dientro del puestu de Conceyos con Encantu, va tener llugar una clas de pandereta y baille tradicional impartíu por Varo Moráis.
Una hora más tarde, a les 19:00 hores, va cellebráse la presentación de la versión asturiana de la obra ‘Kim’, de Rudyard Kipling, per parte d’Eloy Antuña Zamarro nel puestu d’Iniciativa pol Asturianu. Pa rematar la xornada, a les 20:00 hores, el Conceyu de Mieres va ufiertar una tastia de sidra asturiano.
Durante tola xornada va a haber un repartu de materiales n’asturianu nel puestu de la Universidá d’Uviéu y de revistes n’asturianu nel de Conceyos con encantu. Amás, el diariu dixital MiGijón va facer entrega de postales con poemes n’asturianu sobre Xixón. Los participantes van poder algamar una taza dexando una grabación lleendo’l poema. Por segundu añu nesti Día de la Llingua Asturiana, el periódicu El Comercio va ufiertar a los visitantes del so espaciu la posibilidá de sacar la portada d’esi día n’asturianu.
Susana Sela
This work is licensed under a Creative Commons Attribution 4.0 International License.
