Afeutaos poles irregularidaes del IMV entamen una Reclamación Coleutiva sobre IMV y Rentes Mínimes por incumplimientu de la Carta Social Europea

23 Agostu, 2023

Los afeutaos poles reclamaciones del IMV acomuñen en tol Estáu pa poner frenu a una situación incaltenible, qu’afeuta a los más vulnerables, interponiendo una Reclamación Coleutiva sobre IMV y Rentes Mínimes por incumplimientu de la Carta Social Europea

El deficiente sistema de xestión d’esti salariu social lleva a irregularidaes ya inxusticies importantes, denunciaes ya en so momentu n’Asturies pola Asociación Alambique y Andecha Astur, que pidió la condonación de les deldes causaes pola ineficiencia del Gobiernu d’Asturies na materia ya nel añu 2021. Lloñe d’aceutar esta propuesta, los problemes derivaos de la mala xestión d’esta aida a los más desfavorecios continuen, les reclamaciones por “cobros indebios” siguen al orde del díi y son miles les families que, viviendo colo xusto, tienen de facer frente a pagos de miles d’euros.

Tien de quedar mui claro qu’estos cobros indebios son consecuencia de fallos na tramitación por parte de l’alministración, non de fraudes por parte los perceutores. La revisión del IMV faese con efeutu retroactivu, ello ye demientres tou un añu percibes l’importe calculáu en función de lo ganao l’añu anterior -porque toos sabemos que si comiesti l’añu pasáu, esti ya nun necesites comer-; pero una bones pasa l’añu faese la revisión y decídese si cobraste lo que te tocaba o non. Nesti intre pueden pasar dos coses: cobraste de más o cobraste de menos.

Si cobraste de menos, recibirás los atrasos meses más tarde, pero oficialmente los tos ingresos medraron de guelpe, denegándose aides, beques y otres prestaciones en función d’unes perres que nun se sabe cuando vas cobrar.

Si, pior entá, cobraste de más, tendrás que devolvelo. Recibirás entos una carta de tonu menaciante, reclamando esos cobros indebios, a pagar nun plazu de quince díes, con un 20% de recargu. Si nun se paga nos plazos afitaos, la delda tendrá un interés de demora del 25% y aniciaráse’l procedimientu d’ apremiu. La delda nun se paraliza nin entamáu’l procesu xudicial, sinón que les cuanties siguen medrando polos intereses xeneraos. La cuestión llega al estremu de que, si se percibe’l Bonu térmicu, na renta l’añu viniente cuntará como ingresu y al revisar tendrán que devolver esi importe.

Remembremos que falamos del Ingresu Mínimu Vital, una paga que cubre nel meyor de los casos les necesidaes más básiques d’una persona que s’alcuentra en situación de grave precariedá económica, polo que’l pagu d’esos importes, en casos de dellos miles d’euros, ye imposible. Correspuende entós a un xuez determinar si l’erru de los cobros indebios ye de la Seguridá Social o del perceutor, quedando estos na más completa indefensión.

Siendo esti el problema más grave, nun ye l’únicu, les dificultaes pa contautar cola S.S., la falta d’información, los plazos curtios pa presentar documentación, les suspensiones “sospresa” del IMV, la llentitú na xestión de la documentación, el silenciu alministrativu, los cómputos equivocaos que nun hai a quien reclamar, la conxelación de los cobros mentantu faen les xestiones, que pueden allargase meses o años, la falta de coincidencia pente lo vraeramente percibío y lo llegalmente computao… Por tou ello, los afeutaos tan asociandose a nivel estatal y faciendo una recoyía de robles en change.org.

Amás, ufren información detallao sobre comu actuar nestos casos, participando na Reclamación Coleutiva sobre IMV y Rentes Mínimas por incumplimiente de la Carta Social Europea.

Susana Sela