La poeta y traductora Martha Asunción Alonso y l’escritor y activista Inaciu Galán van adentrase nuna velada de conversación ente idiomes y cultures, dende Madrid hasta Xixón, Guadalupe, español, asturianu y criollu, en collaboración con Lliteratura Desesperada y el Ministeriu de Cultura y dientro del Programa d’Afinidaes Electives

L’actu va ser esti 8 de setiembre, día d’Asturies, a les 19:45 hores nel Desesperate Literature de Madrid, asitiáu na cai de Campomanes, 13 y va tar moderáu pol traductor inglés Robin Munby.

La poesía de Martha Asunción Alonso (Madrid, 1986) recibió premios como’l Nacional de Poesía Nueva otorgáu pol Ministeriu de Cultura español (2011), el Adonáis (2012) o’l de Radio Nacional d’España (2015) ente otros. A día de güei, robló una decena de poemarios, ente los que s’inclúin Archipiélaga: antoloxía personal, Balkánica y Wendy, un llibru de relatos y un llibretu d’ópera. Los sos versos traduciéronse a otros idiomes y incluyéronse en numberoses antoloxíes de poesía recién. Dedícase coles mesmes a la traducción de voces antillanes y africanes al español, como l’autora guadalupeña Maryse Condé. Ye doctora en Filoloxía Francesa y anguaño enseña na Universidá d’Alcalá de Henares.

Inaciu Galán y González (Xixón, 1986) ye escritor, periodista, profesor y activista na defensa del asturianu. Ente les sos publicaciones tan el poemariu Nes ruines de la nueche y les hores, el llibru de rellatos Cartes nel horru (y delles hestories más) y ¡Volved las manos al bable! La llingua asturiana nel franquismu. Tien feches y espublizaes en delles revistes tornes al asturianu d’obres en gallegu, castellán, catalán, inglés, portugués o francés, ente otres llingües, y nel añu 2006 espublizó’l primer diccionariu del asturianu con una llingua estranxera, el Diccionariu básicu asturianu-inglés/inglés asturianu. Tamién en 2006 fundó la revista lliteraria Formientu, que vien asoleyando la obra de más d’un cientu d’autores mozos asturianos, convirtiéndose na cantera de la lliteratura n’asturianu. Ye miembru de númberu de l’Academia de la Llingua Asturiana y fundador de la ONG Iniciativa pol Asturianu.

This work is licensed under a Creative Commons Attribution 4.0 International License.