Bonos díes, bona xente.

Alborecemos col cielu nuboso y dalguna gotera, sobre too na fastera más oriental d’Asturies con unes temperatures que tan alrodiu de los 19ºC, rexistrándose nel puirtu Payares 13,6ºC.

Güei salimos del letargu por dos motivos, porque ye’l día d’Asturies y porque tenemos boda nel tiempu N’Asturies , muncha felicidá pa los novios y que ten tranquilos que la previsión ye bona, jijijij.

Güei van dir colando les nubes pa dexanos una mañana soleyera y calurosa con unes temperatures que volverán algamar los 30ºC al mediudía. Yá pela tarde van dir surdiendo nubes de desendolque pela cordelera que mos dexarán xarabatos de calter tormentosu irregularmente rapatios pero con menos probabilidá na fastera central asturiana ya siendo más frecuentes ya intensos na ocidental.

L’aire sedrá sele ya variable.

Mañana sábadu vamos tener un día mui asemeyáu, sicasí les tronaes puen ser dalgo más intenses ya estenses, afeutando a más zones con unes temperatures que van camudar poco, calteniéndose un ambiente caluroso y chornosu.

El domingu tendremos más nubes y descenderán llixeramente les temperatures y otra vegada más podemos tener xarabatos de calter tormentosu durante la tarde pero nun sedrá hasta’l llunes cuando van normalizase les temperatures con másimes yá perdebaxo de los 23-24ºC que dará pasu a una selmana viniente con escases precipitaciones, nubes ya claros nel cielu y temperatures afayaices.

Pues lo dicho, esfrutar tolo que podáis del día d’Asturies collacies ya collacios.