Bonos díes, bona xente.
Nueche y alborada tormentosa que nun preveíen los modelos meteorolóxicos con xarabatos y bastiazos frecuentes ya intensos qu’afeutaron a amplies zones d’Asturies, destacando’l xarazu de más de 2 cm que mos reporten dende Llanes, eso si a pesar de la lluvia les temperatures siguen siendo altes, tando alrodiu de los 18ºC y rexistrándose nel puirtu Payares 13,8ºC.
Güei tendremos más nubes qu’ayeri ya veremos menos el sol pero con unes temperatures másimes que volverán algamar los 30ºC en dellos puntos d’Asturies. Durante la tarde volverán a desendolcase les nubes formandose sistemes tormentosos que van afeutar mayoritariamente al estremo ocidental, onde la truena pue venir acompangana de xarazu y muncho aparatu elléutricu , amás de xarabatos y bastiazos intensos. Otru sistema tormentosu esperase pero yá más tarde y menos importante sobre la vertical de Villaviciosa-Sariego , barriendo primero la Cuenca alta del Nalón.
L’aire sedrá sele ya variable menos en periodu de tormenta y l’ambiente seguirá siendo mui chornosu.
El prósimu riscar y alborada sedrán más seliquinos ya nun tendremos truenes xeneralizaes. Durante’l día volverán a desendolcase les nubes y pela tarde van formase tormentes qu’afeutarán sobre too a la zona de Siero y Villaviciosa y n’esti casu a la cuenca alta del Caudal. Les temperatures descenderán y l’aire seguirá siendo sele ya variable.
L’alborecer del llunes si paez que pue repetise la xugada de güei ya tendremos xarabatos de calter tormentosu n’amplies zones d’Asturies con un tiempu mui inestable, meyorando pela mañana pero otra vegada más desendolcándose les nubes col sol del mediudía, situación que pue estendese hasta’l martes, estabilizándose’l tiempu a partir del miércoles pero esto yá lu diremos viendo.
Que paséis un bon sábadu collacies ya collacios
This work is licensed under a Creative Commons Attribution 4.0 International License.
