Acordies la web del Ministeru pa la Transición Ecolóxica ya’l Retu Demográficu, la estación allugada en Val.le del L.lagu en Somieu, presenta una situación “regular”, daqué inaudito nun llugar de tanta calidá natural como esti

Nun se trata solo del riesgu qu’esta mala calidá del aire representa pa la biodiversidá d’una zona protexía comu esta, sinón que tendría de ser una señal d’alerta sobro’l nivel de contaminación que se ta algamando n’Asturies en xeneral,  tanto que llega inclusive a paraxes tan llonxanos del “Paradisu”. Yá va tiempu que se ta estudiando tamién los efeutos de la contaminación nel Llagu Enol.

A diferencia d’otros contaminantes que son emitíos directamente poles sos fontes, l’ozonu troposféricu ye un contaminante tipu secundariu, esto ye, nun ye emitíu direutamente a l’atmósfera, sinón que se produz nella a partir d’hidrocarburos (compuestos orgánicos volátiles), metanu, monósidu de carbonu y óxidos de nitróxenu que reaccionen cola radiación solar.

En concentraciones altes l’ozonu pue prevocar daños na salú humana, la vexetación y los ecosistemes, siendo amás un factor importante a considerar respectu al cambéu climáticu. Les persones que más riesgu cuerren son aquelles con dalguna enfermedá polmonar. Polo xeneral, afecta principalmente a aquelles persones que realicen exerciciu físicu en campu. Por cuenta de que, como yá se dixo, les reacciones que producen l’ozonu activense pola acción de la lluz solar, les hores en que la concentración d’ozonu nel aire ye más alta son aquelles que van dende’l mediudíi hasta l’anochar.

Alberto Rodríguez

This work is licensed under a Creative Commons Attribution 4.0 International License.