@eltiempunasturies
Bonos díes, bona xente.
Alborecemos ente nubes ya claros ya con unes temperatures que tan alrodiu de los 16ºC, rexistrándose nel puirtu Payares 9,2ºC.
Güei va entrar dalgo de nubosidá pel llitoral a primera hora de la mañana que pue dexar dalgo d’orpín, tando más escampláu hacia la cordelera onde pela tarde tenderán a surdir nubes de desendolque pero sin ninguna consecuencia, les temperatures ascenderán les másimes y l’aire sedrá sele ya variable con predominiu del nordés pela tarde.
Mañana xueves una vegada que se dixebren los borrinos y nublines del alborecer quedará’l cielu escampláu con un nuevu ascensu de les temperatures másimes, sicasí pela tarde podemos tener nubosidá de retención nos cordales del llitoral oriental d’Asturies.
El vienres arrancará’l día con bon tiempu y temperatures n’ascensu pero pela tarde van dir surdiendo nubes de desendolque que mos puen dexar dalgún xarabatu de calter tormentosu irregularmente repartiu, más probable nel interior. Y el sábadu sedrá un día pasau por agua pero esto yá lu diremos viendo.
Que paséis un bon miércoles collacies ya collacios.
Llaguna de Babia y el cumal Pena Larga, semeya que mos l’apurre’l nuesu collaciu, el Pastorin de Xove.
This work is licensed under a Creative Commons Attribution 4.0 International License.
