Bonos díes, bona xente.
Alborecemos col cielu empuercáu de nubes medies y altes ya con unes temperatures que tan alrodiu de los 17ºC, rexistrándose nel puirtu Payares 13,9ºC.
Güei vamos tener nubosidá media-alta que tenderá a desendolcase a partir del mediudía y dexanos xarabatos de calter tormentosu pela tarde, más probables ya intensos primeru na fastera ocidental y dempués na oriental, siendo poco probables nel centru con unes temperatures que medrarán bultablemente con ambiente chornosu.
Mañana sábadu la entrada de vientu de componente sur fadrá que la humedá baxe y les temperatures sigan siendo altes, amás pue soplar con raches fuertes en zones altes de montaña, siendo sele nel restu, les precipitaciones quedarán na cordelera tandu’l restu abellugaos per ella. El cielu va tar empuercáu de nubes medies y altes y la nubosidá más abondosa tará na fastera surocidental y cordelera.
El domingu la situación sedrá asemeyada, sicasí tendremos menos nubes y les precipitaciones sedrán menos probables entovía.
Que paséis un bon vienres collacies ya collacios.
La Cordal de Bufarán dende La Peral (conceyu d’Illas), semeya que mos l’apurre’l nuesu collaciu Xuan Nel Gonzali.
This work is licensed under a Creative Commons Attribution 4.0 International License.
