Xulio Vixil gana’l 44 Premiu Xosefa Xovellanos de Novela n’asturianu cola obra Miel amargo, de la que’l xuráu rescampló “que se trata d’una novela áxil, d’arruelu, que combina humor, amor y intriga y qu’esplora les posibilidaes qu’ufierta l’universu paralelu, basáu nes teoríes científiques sobre’l tema, por exemplu, la teoría de les cuerdes”. El gallardón ta dotáu con 6.000 euros y la espublización de la obra ganadora.

Pel so llau, Héctor Braga ganó la ventésimo novena edición del Premiu «Máximo Fuertes Acevedo» d’Ensayu en llingua asturiana, que concede la Viceconseyería de Cultura, Política Llingüística y Deporte, cola obra titulada Nel cantu la memoria. Ensayu sobro l’asturianada tradicional. El premiu ta tamién dotáu con 6.000 euros y la espublización.

El xuráu destacó d’esti trabayu que ye una “aportación al estudiu y divulgación de la música y cultura asturianes nun trabayu rigorosu y bien documentáu sobre l’asturianada, atendiendo a toles estayes qu’intervienen nesta gran seña cultural d’Asturies”. Amás, el fallu resalta «l’usu del llinguaxe, natural, fluyíu y correctu qu’imprime axilidá y amenidá  a la llectura de la obra».